सडक संघर्ष गरेरै हिन्दु राष्ट्र स्थापना गर्छौं : कमल थापा

न्यूज ब्यूरो, जनकपुरधाम । राष्ट्रिय प्रजातन्त्र पार्टीका अध्यक्ष कमल थापाले सडक आन्दोलनबाटै हिन्दू राष्ट्र स्थापना गर्ने चेतावनी दिएका छन् ।

पार्टीको मेची महाकाली राष्ट्रिय स्वाभिमान अभियान अन्तर्गत शनिबार धनुषाको धनुषाधाममा आयोजित कार्यक्रमलाई सम्बोधन गर्दै उनले हिन्दु राष्ट्र स्थापनाका लागि सडक संघर्ष बाहेक अन्य विकल्प नरहेको बताएका हुन् ।

अधिकांश जनता हिन्दु राष्ट्रको पक्षमा रहे पनि शीर्ष दलले जबरजस्ती पेलेर धर्मनिरपेक्ष राष्ट्र घोषणा गरेको उनले आरोप लगाएको छ । संसदमा आफ्नो पार्टीको बहुमत नरहेकाले सडक आन्दोलनबाटै हिन्दू राष्ट्र स्थापना गरिने उनको भनाइ छ ।

अध्यक्ष थापाले मुलुकमा हिन्दू राष्ट्र घोषणा गर्नुपर्ने, संघीयताका विषयमा राष्ट्रिय जनमत संग्रह गर्नुपर्ने लगायतका २२ बुँदे माग राखेर प्रधानमन्त्री केपी शर्मा ओलीलाई ज्ञापनपत्र बुझाएको जानकारी दिए ।

उनले आफूहरुले राखेको माग फागुन मसान्तभित्र पूरा नभए चैतदेखि देशव्यापी संघर्षमा उत्रने र हिन्दु राष्ट्र घोषणा गर्न सरकारलाई बाध्य बनाउने चेतावनी दिए ।

राप्रपाका जिल्ला अध्यक्ष मनोज मल्लको अध्यक्षतामा भएको कार्यक्रममा प्रमुख अतिथिको रुपमा राप्रपा अध्यक्षसमेत रहेका कमल थापा, अतिथिका रुपमा पूर्वमन्त्री भिम प्रसाद गौतम, नेता राजेन्द्र लिङ्ग्देल, धनुषा क्षेत्र १ का अध्यक्ष पुरुषोत्तम सापकोटा, धनुषाधाम नगरपालिकाका मेयरकी प्रत्यासी प्रेक्षा मल्ल लगायत सहभागी थिए ।