जनकपुरमा 'भ्यालेन्टाईन डे' होईन, 'आमाबुवा पूजन डे' मनाइयो

न्यूज ब्यूरो, ३ फागुन । सँस्कृतिको नगरी भनेर पहिचान बनाएको जनकपुरधाममा पश्चिमी सभ्यता प्रणय दिवसलाई मात दिँदै 'आमावुवा पूजन डे' मनाइएको छ ।

युवायुवतिहरुले १४ फेरबरीको दिन भ्यालेनटाईन डे अर्थात प्रणय दिवस मनाईरहदा जनकपुरधाम स्थितको राधाकृष्ण योग सेवा केन्द्रले जनकपुरमा आदर्श आमा बुबाको दिव्य पूजन गरेको छ । जनकपुरधाम उपमहानगरपालिका वडा नं. १२ को हनुमाननगर स्थित राधाकृष्ण योग सेवा केन्द्रको आयोजनामा संस्थाका अध्यष योग गुरु बिनय भाईको अध्यक्षता तथा प्रदेश नं. २ प्रमुख रत्नेश्वरलाल कायस्थको प्रमुख आतिथ्यमा आमा बुबालाई पुजा गरी दिव्य पूजन गरिएको हो ।

कार्यक्रममा बृद्धा आश्रमका बृद्धाहरुलाई पुजा तथा सम्मान गरिएको छ । प्रणय दिवसमा युवा युवतीले प्रेम गरी मनाउने होईन कि बुबा आमालाई प्रेम र पुजा गरी मनाउनुपर्ने उद्देश्य सहित कार्यक्रम आयोजना गरेको थियो ।

कार्यक्रमलाई सम्बोधन गर्दै प्रदेश २ का प्रमुख कायस्थले आमा बुबाको पुजन गर्ने यस दिवसलाई आदर्श चरित्र निर्माण दिवसका रुपमा ग्रहण गर्न आवश्यक रहेको बताए । उनले आफुभन्दा ज्येष्ठलाई सम्मान तथा सानालाई आशिर्वाद दिने जस्ता सँस्कारको क्रम बृद्धि हुन सके समाजमा असल चरित्र निर्माण हुने बताएका छन् । साथै माता पिताको कहिल्यै पनि चित्त दुखाउन नहुने धारणा राख्दै आमा बुबालाई श्रद्धापुर्वक सम्मान तथा पुजा गर्नुपर्ने बताए ।

कार्यक्रममा अध्यक्षता गरेका योग गुरु बिनय भाईले माता पितालाई अनादर गर्न नहुने भन्दै सम्मा गर्न श्रवणकुमार बाट हामीले पाठ सिक्नुपर्ने बताएका छन । सँसारमा आमाभन्दा ठुलो माया र प्रेम कसैको हुन नसक्ने दावी समेत गरे । त्यसैले आमाको सम्मान तथा पुजा पाठ गर्नुपर्ने धारणा राखे ।

त्यस्तै, कार्यक्रमा धनुषाका प्रमुख जिल्ला अधिकारी प्रदिपराज कणेलले मधेशमा दहेज, बालबिवाह जस्ता कुसंस्कारहरु बढ्दै गईरहेको प्रति चिन्ता व्यक्त गर्दै यसलाई निर्मुल पार्न आवश्यक रहेको बताए । त्यस्तै , बृद्धाहरुलाई बृद्धा आश्रममा बस्नुपर्ने अवस्थाको अन्त्य गर्नुपर्ने बताए ।

सेवाकेन्द्रले चारवर्षदेखि आमा बुबा पुजन समारोहको आयोजना गर्दै आएको छ । कार्यक्रममा गौसंरक्षण मञ्चका अध्यक्ष जग्दीश महासेठ, योग गुरु बिमल पंडित, सामाजिक अभियन्ता भोगेन्द्र लाल कर्ण, तथा साधक साधिकाहरुको उपस्थिति रहेको थियो ।

प्रत्येक वर्ष जनकपुरका केही युवाहरुले पश्चिमी सभ्यतालाई विस्तार गर्न खोजेका थिए भने यसपालीदेखि प्रणय दिवसलाई पनि यथावतै राख्दै आमावुवासँगको प्रणय दिवस उत्तम हुने सँकेत दिएका छन् । आमावुवा पूजन डे जनकपुरमा अब प्रत्येक वर्ष मनाइने भएको छ ।