जनकपुर: भारतीय गाडीमा युवकको लास, हेटौडाबाट प्रहरीको 'डग टिम' आउँदै !

जनकपुरधाम, २० माघ । एकाविहानै धनुषामा एक युवकको लास एक भारतीय नम्बर प्लेटको गाडीमा भेटिएपछि हलचल नै मच्चियो ।

पूर्व पश्चिम राजमार्ग अन्तर्गत धनुषाको मिथिला नगरपालिका वडा नं. ३ हरिहरपुर स्थित खेतमा एक भारतीय नम्बर प्लेटको गाडीमा युवकको लासदेखेपछि स्थानीयहरुले प्रहरीलाई खवर गरेको थियो । राजमार्गदेखि करिब ५० मिटर तल महेन्द्रनगर जाने लोकमार्गमा युवकको लास फेला परेको हो ।

बिआर ०७ पीए ५०८७ नम्बरको चारचक्के गाडीमा एक युवकको लास अलपत्र देखिएपछि खेत गएका स्थानीयवासीहरुले तत्कालै प्रहरीलाई खवर गरेको थियो । खवर पाएलगत्तै घटनास्थल पुगेका धनुषाको ईलाका प्रहरी कार्यालय ढल्केवर तथा प्रदेश प्रहरीको सँयुक्त टोलीले घटनास्थलको २०० मिटर चारैतर्फ घेराबन्दी गरेको हो ।

घटनाको प्रकृति हेर्दै प्रदेश प्रहरीको आग्रहमा घटनाको सुक्ष्म अनुसन्धानको लागि हेटौडाबाट डग टोली (प्रशिक्षित कुकुर) अर्थात कुकुर सहितको प्रहरी टोली आउने भएको छ । टोली आएपछि घटनास्थलमा अनुसन्धान सुरु गरिने ईलाका प्रहरी कार्यालय ढल्केवरका प्रहरी नीरिक्षक सरोज राईले जानकारी दिए ।

युवको नाम, ठेगाना तथा घटना कसरी भएको बारे अहिले खुल्न सकेको छैन, अनुसन्धानपछि मात्र केही भन्न मिल्ने प्रहरीले जनाएको छ ।