जनप्रतिनीधिहरु एकजुट भए नगरपालिका नमुना बन्छ : उपमेयर माथेमा

जनकपुरधाम, १४ माघ । धनुषाको क्षीरेश्वरनाथ नगरपालिकाकी उपमेयर रचना माथेमाले जनप्रतिनीधिहरु एकजुट भएर काम गरे नगरपालिका नमुना नगरपालिका बन्ने बताएकी छन् ।

क्षीरेश्वरनाथ नगरपालिकाका निर्वाचित जनप्रतिनिधि र कर्मचारीहरुलाई स्थानीय सरकार संचालन तथा बजेट योजना तर्जुमा सम्बन्धी तिन दिने तालिमको समापन क्रममा उपमेयर माथेमाले नगरपालिकाका जनप्रतिनीधि , आम जनता र कर्मचारी एकजुट भई काम गर्नुपर्ने बताइन् ।

जनकपुरधामको मुजेलिया स्थित ग्रामिण विकास प्रशिक्षण केन्द्रमा शुक्रवार देखि सुरु भएको उक्त तालिम आईतबार समपन्न भएको छ । कार्यक्रम समापन गर्दै क्षीरेश्वरनाथ नगरपालिकाका उपप्रमुख रचना श्रेष्ठ(माथेमा)ले नगरलाई कसरी राम्रो बनाउने र जनताले अपेक्षा गरे अनुसार विकासका कार्यक्रमहरूलाई सबै जनप्रतिनिधिहरु एकजुटभई अगाडि बढाउनु पर्ने बताइन ।

उनले तालिममा सिकेका कुरालाई व्यवहारमा उतारेर अगाडि बढेमा नगरपालिका नमूना बन्ने बताए । नेपालको संघीय व्यवस्था अन्तर्गत संघ, प्रदेश र स्थानीय तहको ऐन, कानून र अन्तरसम्बन्ध तथा स्थानीय तहका पदाधिकारीको काम, कर्तव्य र अधिकारको बारेमा जानकारी गराउने उदेश्यले नगरपालिकाले तालिमको अयोजना गरेको नगरपालिकाका प्रमुख प्रशासकीय अधिकृत इन्द्रदेव यादवले जनाए ।

तालिममा १० वटै वडाका जनप्रतिनिधि तथा कर्मचारीहरुको सहभागीता रहेको थियो ।