वडाध्यक्षको छोरा हुँ भनेर धाक लगाउँदै ट्राफिक प्रहरी उपर हातपात

बर्दिवास, ११ पुस । आफू वडाध्यक्षको छोरा हुँ भनेर धाक लगाउँदै महोत्तरीमा ट्राफिक प्रहरी उपर नै हातपात गरेको घटना बाहिरिएको छ ।

महोत्तरी जिल्लाको औरही नगरपालिका वडा नम्बर १ का वडाध्यक्ष राजकिशोर चौधरीका छोरा राजु चौधरीले ट्राफिक प्रहरीलाई हातपात गरेका छन् । मंगलवार बिहान् ११ बजे बिना हेल्मेटको मोटरसाइक चलाइरहेको अवस्थामा ट्राफिकले हेलमेट किन नगाएको भनेपछि मोटर साईकलबाट झरेर गुण्डा शैलीमा ट्राफिक प्रहरीमाथि हातपात गरेको प्रहरीले जनकारी दिएका छन् ।

मेरो बुवा वडा अध्यक्ष छ थाहाँ छैन ? त्यतिकै बिना हेलमेट हिडेको होईन, म हेलमेट नलगाउँदैमा कसले के गर्न सकिन्छ ? भनिदै ट्राफिक प्रहरीलाई हातपात गरेका छन् ।

वडाध्यक्षका छोरा चौधरीलाई कारवाहीको लागि ईलाका प्रहरी कार्यालय गौशाला लगिएको प्रहरी चौकी औरहीका इन्चार्ज राम नरेश साहले बताए ।

स्थानीय निकायको चुनावपछि गाउँ गाउँमा आएको सिँहदरबार नभेटाएपनि गाउँका तुक्का सिँहहरु भन्दै कानुन मिचेर आफ्ना अलगै राज्य कायम गरेको देखिएको छ । गाउँका आम नागरिकलाई सास्ती हुनकै लागि र आफ्नो वर्चश्व बढाउनको लागि कानुनसँग खेलवाड गरेपनि धेरै जसो ठाउँमा प्रहरी नीरिह पनि देखिएको छ ।

ग्रामिण भेकमा विशेष गरी जनप्रतिनीधिको धाक लगाउँदै जनप्रतिनीधि सहित उनका नातागोेता र लठैतहरुले समेत कानुनलाई धज्जिया उडाउँदै गरेको देख्न सकिन्छ । आफू स्थानीय स्तरको सरकार हो भनेर धाक लगाउँदै जेपनि गर्न सकिने तुच्छ मानसिकताका कारण अपराधको आँकडा भने दिनानुदिन बढदै गएको देखिएको छ ।