आगलागी पीडितलाई नगरपालिकाद्धारा ५० हजार राहत

न्यूज ब्यूरो, सिरहा । सिरहाको मिर्चैया नगरपालिका वडा नं. १२ सिक्रौनमा गत शुक्रबार राति साढे १० बजेतिर भएको आगलागिका पीडितलाई नगरपालिकाद्धारा राहत प्रदान गरिएको छ । नगर कार्यपालिकाबाट निर्णय गरी पीडित परिवारलाई तत्काल राहत स्वरुप नगरपालिकाले ५० हजार रुपैयाँसहित ५ थान कम्बल, १ थान त्रीपाल र खाद्यान्न सामाग्री प्रदान गरेको हो ।

मिर्चैया नगरपालिकाका नगरप्रमुख श्रवण यादवले पीडित कुलेश्वर यादवको घरमै पुगी राहत हस्तान्तरण गरेका हुन् ।
आगलागीबाट करिब १० लाखबढीको क्षति भएको छ ।

आगलागीमा २ वटा फुसको घर जलेर पूर्ण रुपमा नष्ट भएको छ भने एउटा घरमा आंशिक क्षति भएको छ । घरमा रहेका अन्नपात, लताकपडा जलेर नष्ट भएको छ । त्यसैगरी, दुई वटा भैंसी र एउटा गोरु समेत जलेर मरेका छन् ।

शुक्रबार राति लामखुट्टे भगाउन बालेको आगो सल्किएर भएको आगलागी स्थानीयहरुकै सहयोगमा नियन्त्रणमा आएको थियो ।