अब स्थानीय सरकारसँग युवाहरुले संवाद गर्ने

न्यूज ब्यूरो, जनकपुरधाम । स्थानीय तहमा देखिएको बेतिथिलाई न्यूनीकरण गर्न तथा युवाहरुको सहभागीताको लागि युवा संवाद समुह धनुषाले पहलकदमी गर्ने भएको छ ।

युवा संवाद समूह धनुषाको विहिबार बसेको नियमित बैठकबाट महत्त्वपूर्ण निर्णयहरु अघि सारेको हो । विहिबारको सामुहिक बैठकबाट संवादको माध्यम बाट समस्या समाधानमा सहजीकरण गर्ने यो संस्थाले ४ बिषयमा एकसाथ काम गर्ने गरि युवा संवाद समुहलाई ३ वटा अलग अलग समुहमा विभाजन गरि कार्यसंचालन गर्ने महत्त्वपूर्ण निर्णय पनि गरेको हो ।

बैठकबाट स्थानिय सरकार सँग युवाको विषयमा नीति नियममा नै कसरी सहभागी गराउन सकिन्छ भन्ने बिषयलाइ अगाडि बढाउने , युवा र प्रहरीको बिचमा रहेको समस्यालाई संवाद मार्फत कम गराउने जस्ता बिषयलाई गम्भिरतापूर्वक काम गर्ने प्रस्ताव तहत निर्णयहरु गरिएको हो ।

यस्तै, युवा र पत्रकारसँग युवाहरूको पत्रकार प्रतिको अपेक्षा अनि पत्रकारहरूको युवा सम्बन्धि समग्र दृष्ट्रीकोणको साथमा युवाको विषयमा स्थानीय तहसँग भएको अधिकार र प्रयोगमा सँचारको भूमिका भन्ने बिषयमा कार्यशाला संवाद कार्यक्रम पनि तय गरेको छ ।

आजको बैठकबाट गरिएको एक्सन प्लानको प्रस्तावलाई मूर्त रुप दिनको लागि विभाजन गरिएको तीनै समूहबाट एक एक जनाले नेतृत्व गरिरहेका छन् भने नेतृत्वकर्ता सहित प्रत्येक समूहमा रहेका पाँचै जनाले समयानुकुल संवादको मार्फतबाट मुद्दा टुँगो लगाउने भएको छ ।