बसको आतंकः १४ महिनाकी छोरीसँग आमा खोसे

न्यूज ब्यूरो, सप्तरी । सप्तरीमा बसको ठक्करबाट १ महिलाको मृत्यू भएको छ । राजविराज–रुपनी सडकखण्डअन्तर्गत सप्तरीको रुपनी गाउँपालिका–१ मा बसको ठक्करबाट गएराति एक महिलाको मृत्यु भएको हो । काँखमा रहेकी उनकी छोरी घाइते भएकी छिन् ।

राजबिराजबाट रुपनीतर्फ जाँदै गरेको ना १ ज ८१०३ नम्बरको बसले पैदलयात्री स्थानीयवासी ३८ वर्षीया प्रमिलादेवी पासवान र उहाँको साथमा रहेकी १४ महीनाकी छोरी प्रबती कुमारीलाई ठक्कर दिँदा दुवै जना घाइते भएका थिए ।

बस अत्यधिक गतिका कारण नियन्त्रण गर्न नसक्दा दुर्घटना हुन पुगेको प्रहरीले जनाएको छ ।

ठक्करबाट गम्भीर घाइते प्रमिलाको रुपनीस्थित युनिक अस्पतालमा उपचारको क्रममा राति मृत्यु भएको जिल्ला प्रहरी कार्यालयले जनाएको छ ।

बस र चालक प्रहरीको नियन्त्रणमा रहेको छ ।