यज्ञका लागि विशाल कलश यात्रा

न्यूज ब्यूरो, सिरहा । सिरहाको बरियारपट्टी गाउँपालिकामा २४ घण्टे यज्ञ सुरु भएको छ । बरियारपट्टी वडा नम्बर–४ नबटोलीमा ब्रह्म (नगर डिँहवार) पुजा र २४ घन्टे अष्टयाम सुरु भएको हो ।

नबटोलीस्थित रहेको मन्दिरमा सुरु भएको पुजन कार्यक्रममा ४०० बढी सहभागीसहितको विशाल कलश यात्रा निकालिएको थियो ।

बाजागाजासहित निकालिएको कलश यात्रा गाउँपालिकाको विभिन्न भागको परिक्रमा गरी श्रीपुर र हरिपुरको बीचमा अवस्थित उत्तरवाहिनि खोलामा जलभरेर मन्दिरमा स्थापित गरिएको मन्दिरका महन्थ मिश्री कामतले बताए ।

समाजमा अमनचैन, सुख, शान्ति होस भन्ने धार्मिक विश्वासले यज्ञ आयोजना गरिएको हो । उक्त यज्ञमा विभिन्न गाउँका ७ समूहका कृर्तन मण्डलीले साजबाजका साथ आ–आफ्नो प्रदर्शनी गर्नेछन् ।

२४ घण्टा “सिताराम सिताराम” जप हुने यस यज्ञमा बुधबार ३ वजेपछि प्रवचन ( रामको कथा) हुने आयोजकले जनाएको छ ।

यस किसिमका कार्यक्रमले हिन्दु संस्कृतिको जगेर्ना तथा विकासमा टेवा एवं समाजमा शान्तिको आभाष हुने विश्वास गरिन्छ ।