जनकपुरको दुई मन्दिरमा चोरी, एक पक्राउ

न्यूज ब्यूरो, जनकपुरधाम । दशैंको आगमनसँगै जनकपुरधाममा धुमधाम र दशैँ तथा शक्तिपीठहरुमा पूजाआजा चलिरहेको बेला दुई अलगै अलगै स्थानको शक्तिपीठबाट चोरीको घटना सार्वजनिक भएको छ ।

जनकपुरधाम उप महानगरपालिका वडा नं. ९ बंशीचोक स्थित रहेको बौद्धिमाई मन्दिरबाट गएराती बाजागाजा सेट चोरी भएको छ । गएराती करिब १ बजेको समयमा मन्दिरमा लगाइएको लाउडस्पीकरको बाजा सेटहरु चोरी भएको स्थानीय सुरेश शर्माले जानकारी दिए ।

उक्त बाजा सेटहरु स्थानीय निकायको चुनावमा वडा नं. ९ का राजपाबाट वडाध्यक्षका प्रत्यासी बलिराम साहले उपलब्ध गराएका थिए । चोरी कसले र किन गरेको हो भन्ने खुल्न सकेको छैन ।

स्थानीय सुरेश शर्माका अनुसार मन्दिर निर्मााण कार्य अगाडी पनि स्थानीय दुईतीन जनाले मन्दिर निर्माणको विरोधमा रहेका थिए । स्थानीय हेमन्त साह यसअघि मन्दिर निर्माणको विरोध गर्दै आएका थिए । सार्वजनिक जग्गा भन्दै आएपनि मन्दिर निजी जग्गामा परेको भन्दै विरोध जनाउँदै आएका थिए ।

चोरी कसले र किन गरेको बारे खुल्न सकेको छैन भने वडा प्रहरी कार्यालय मुजेलियाले घटनाको मुचुल्का उठाएर लगेको तथा अनुसन्धान अगाडी बढाएको जनाइएको छ । बाजा सेट करिब ८० हजार मूल्य बराबरको रहेको थियो । बलिराम साहले मन्दिरमा सुहावनको लागि निःशूल्क सहयोग स्वरुप उपलब्ध गराएका थिए ।

यसका साथै, जानकी चोक स्थित रहेको पल्टीमाई मन्दिरको दानपेटीबाट दान चोरी गरेको भन्दै प्रहरीले एक जनालाई पक्राउ गरेको छ । गएराती जानकीचोक स्थित रहेको तरकारी बजार नजिकै रहेको पल्टिमाई मन्दिरको दानपेटीको सिसा फुटाएर दानको रकम चोरी गरेको आरोपमा धनुषाको क्षीरेश्वरनाथ नगरपालिका वडा नं. ६ रमदैया बस्ने बर्ष २२ का रविन्द्र यादवलाई प्रहरीले पक्राउ गरेको हो ।

यादवलाई पक्राउ गरी दुवै ठाउँको चोरीको बारेमा अनुसन्धान थालिएको जिल्ला प्रहरी कार्यालय धनुषाले जनाएको छ ।