संविधान दिवसः कतै बिरोध, कतै खुशियाली

न्यूज ब्यूरो, महोत्तरी । मधेस केन्द्रित दलले तेस्रो संविधान दिवसलाई कालो दिनको रुप मानेर महोत्तरीको जलेश्वरमा प्रदेश नम्वर २ की राज्य मन्त्रि डिम्पल झाको अगुवाईमा संविधान संशोधन गर, नाराका साथ शिक्षा कार्यालय देखि जलेश्वर बजार सम्म रैली निकालेका छन् । राति १५ मिनेट सम्म अन्ध्यारोमा बसेर बल्याक आउट गरी संविधान दिवसलाई कालो दिन मनाउन अनुरोध गरेका छन् ।

यता महोत्तरीको बर्दिबासमा मुसहरहरुले आफ्नो गाउँमा वृक्षा रोपण गरेका छन् । धुर्मुस सुन्तली फाउण्डेसनद्वारा १६ महिना अघि निर्माण भएको एकीकृत नमूना मुसहर बस्तीका स्थानीयहरुले वृक्षा रोपि संविधान दिवस मनाएका हुन् ।

चुरे क्षेत्रको संरक्षणमा काम गर्दै आएका बर्दिबास स्थित सामुदायिक विकास तथा पैरवी मञ्च नेपालले उपलब्ध गराएको बिरुवाका बोट मुसहर बस्तीबासीले आफ्ना घर अगाडीको फुलबारीमा रोपेको बस्तीका युवा मञ्जय मुसहरले जनाए ।

बस्तीमा वृक्षा रोपण गर्दा गाउँले मंगलबारदेखि नै खाल्टो खन्न जुटेका थिए । बुधबार बिहानैदेखि चलेको वृक्षा रोपण कार्यक्रम पाँच घण्टासम्म चलेको थियो। तराई मधेसको पर्यटकीय स्थलको रुपमा विकास भएको एकीकृत नमूना मुसहर बस्तीका सडकको दुवै तिर वृक्षा रोपण गरिएको हो । बस्तीका केटाकेटीको विशेष सक्रियता रहेको वृक्षा रोपणमा कसैले खाल्टो खनेका थिए भने कसैले फूलमा पानी हालेका थिए ।

वृक्षा रोप्ने कार्यक्रममा इलाका प्रशासन कार्यालय बर्दिबासका प्रमुख विमल भट्टराई, दलित अधिकारकर्मी सन्त परियार, पूर्व शिक्षक बासुदेव महतो, समाजसेवी शंकर फुयाँललगायतको सहभागी थियो ।