मेसिनका देवता 'विश्वकर्मा पूजा' धुमधामका साथ मनाइदै

न्यूज ब्यूरो, जनकपुरधाम । यन्त्रका देवता भनेर मान्यता दिएको हिन्दुधर्मावलम्बीहरुको अराध्यदेव विश्वकर्माको पूजा सोमबार जनकपुर लगायत देशैभरि धुमधामका साथ मनाइदै छ ।

जनकपुरधामको विभिन्न चोक चौराहा, फर्निचर, मेसिनरी पसल र कलकारखानामा विश्वकर्मा ठुल ठुला प्रतीमा राखेर पूजाआजा गरिदैछ भने ग्रामिण भेकमा समेत विभिन्न ठाउँमा विश्वकर्माको प्रतीमा सजाएर पूजाआजा सहित मेला समेत लगाउने गरेको देखिएको छ ।

कन्या अर्थात् आश्विन सङ्क्रान्तिका दिन आज कालीगढले विश्वकर्माको पूजाआजा गरी विश्वकर्मा दिवस मनाउँदैछन् । द्वापर युगमा भगवान् कृष्णलाई राक्षसले दुःख दिएपछि विश्वकर्माले समुद्रको बीचमा ‘भेद द्वारका’ बनाइ लुकाएको धार्मिक विश्वास छ । एकै रातमा समुद्रको बीचमा ‘भेद द्वारका’ को निर्माण गरेकाले विश्वकर्मालाई सफल वास्तुविद्का रुपमा मानी त्यसै समयदेखि पूजाआजा गर्ने परम्परा बसेको नेपाल पञ्चाङ्ग निर्णायक समितिका अध्यक्ष एवं धर्मशास्त्रविद् प्रा डा रामचन्द्र गौतम बताउनुहुन्छ ।

प्राचीन भारत वर्षका चारदिशाका रक्षक देवतामध्ये द्वारकालाई पश्चिम दिशाको रक्षकका रुपमा समेत मानिन्छ । विश्वकर्माले निर्माण गरेको ‘भेद द्वारका’ अहिले पनि भारतको गुजरात राज्यमा समुद्रको बीचमा रहेको विश्वास गरिन्छ । विश्वकर्मालाई वास्तु विद्याका विशिष्ट ज्ञाताका रुपमा समेत मानिन्छ ।

यही सम्झनामा नेपालका कालीगढले आज भव्यरुपमा विश्वकर्मा बाबाको पूजा गरी उहाँको विद्वताको सम्मान गर्ने र यसो गरेमा आफूमा पनि विश्वकर्माको गुण प्राप्त हुने विश्वासका साथ पूजा गर्दछन् । आजको दिनलाई वास्तुविद्ले वास्तु दिवसका रुपमा समेत मनाउने गर्छन् ।