रौतहट बस दुर्घटनाः दुईको उपचारको क्रममा ज्यान गयो

न्यूज ब्यूरो, रौतहट । रौतहटमा मंगलवार भएकोे बस दुर्घटनामा परि घाईते भएका मध्ये दुई जनाको बुधवार उपचारको क्रममा मृत्यु भएको छ । चन्द्रपुर नगरपालिका १ स्थित पौराईको वागमतीमामा मंगलवार साँझ यात्रुबाहक बस र ट्रक एकआपसमा ठोक्किदा चालक सहित १७ घाइते मध्ये २ जनाको मृत्यु भएको हो ।

पुर्व पश्चिम राजमार्ग अन्तर्गत चन्द्रपुर १ पौराई स्थित वागमतीमा रौतहट तर्फ बोलबम यात्रुलाई लिएर आउदै गरेका ना.३ ख. १६६५ नम्वरको यात्रुबाहक बस र पश्चिमबाट पुर्व तर्फ गईरहेको ना. ५ ख. ५८३८ नम्वरको मालबाहक ट्रक हिजो साँझ ६ बजेको समयमा एक आपसमा ठोकिएको थियो ।

ट्रक र बस एक आपसमा ठोक्किदा गम्भीर घाईते बसका चालक रौतहट चन्द्रपुर ९ सिन्धुरेघारीका सानुकान्छा बिक र रौतहट मौलापुर नपा ४ का यात्रु ४५ बर्षका पाचु साहको ज्यान गएको जिल्ला प्रहरी कार्यालय रौतहटले जनाएको छ । दुर्घटनामा परी १५ जना यात्रु सामान्य घाईते भएका थिए ।

पौराईको नुनथर महादेव स्थानबाट बोलबम यात्रुलाई दर्शन गराएर फर्किदै गर्दा प्रहरी चौकी अगाडी भएको उक्त दुर्घटनामा परेर गम्भीर घाईते भएका दुवैजना लाई उपचारका लागि वीरगंज लगेको भएपनि बुधबार बिहानै उनीहरुको ज्यान गएको रौतहट प्रहरीका एसपी केदार ढकालले बताए ।

सामान्य घाईते रहेका बिरामीहरुको उपचार चन्द्रपुर स्थित बिभिन्न अस्पतालमा गरिएको तथा उनीहरुमा अधिकाँश घर फर्किसकेको भएपनि ट्रकका चालकलाई उपचारको लागि काठमाण्डौ पठाइएको प्रहरी श्रोतबाट बुझिएको छ ।