राराब क्याम्पसको आर्थिक तथा प्रशासनिक गतिविधि पारदर्शी बनाउन विद्यार्थीहरुको धर्ना

न्यूज ब्यूरो, जनकपुरधाम ।जनकपुरधामस्थित रामस्वरूप रामसागर बहुमुखी क्याम्पसमा आर्थिक तथा प्रशासनिक गतिविधि पारदर्शी बनाउन माग गर्दै संयुक्त विद्यार्थी संघर्ष समितिले क्याम्पस प्रमुखसमक्ष १० बुँदे मागपत्र बुझाएको छ ।

समितिले आर्थिक वर्ष २०८२/०८३ मा क्याम्पसमा आपूर्तिकर्ता, फर्म तथा कम्पनी सूचीकृत गर्न सार्वजनिक गरिएको सूचनाको प्रतिलिपि, सूचीकृत फर्मको विवरण तथा सम्बन्धित निर्णय वा प्रमाण सार्वजनिक गर्न माग गरेको छ । यस्तै, आर्थिक वर्ष २०८३/०८४ का लागि फर्म तथा आपूर्तिकर्ता सूचीकृत गर्ने सूचना, सूचीकृत फर्मको सूची, छनोटको आधार र सम्बन्धित निर्णयसमेत सार्वजनिक गर्न भनिएको छ ।

विद्यार्थीहरूले क्याम्पसको टीडीएस विवरणमा देखिएका कस्मेटिक, गल्ला–किराना लगायतका आपूर्तिकर्तासँग सम्बन्धित बिल तथा बिजक, प्यान तथा भ्याट विवरण, खरिद आदेश र भुक्तानीसम्बन्धी आवश्यक कागजात सार्वजनिक गर्न माग गरेका छन् ।

त्यस्तै, क्याम्पसको ४ करोड रुपैयाँको योजनालाई टुक्रा–टुक्रा गरी कार्यान्वयन गरिएको भए त्यसको आवश्यकता, कानुनी तथा प्रशासनिक आधार, खरिद विधि र औचित्य स्पष्ट गर्न माग गरिएको छ ।

गत असार ६ गते क्याम्पस प्रशासनबाट जारी ध्यानाकर्षण पत्रको बुँदा नम्बर ४ मा उल्लेखित विषयको आधार, प्रमाण र पुष्टि सार्वजनिक गर्न पनि समितिले माग गरेको छ । टीडीएस विवरणमा देखिएको ‘Bata A/C ear bus’ सम्बन्धी भुक्तानीको उद्देश्य, सेवा वा सामानको विवरण, बिल/सम्झौता तथा भुक्तानी स्वीकृतिसम्बन्धी कागजातसमेत सार्वजनिक गर्न भनिएको छ ।

सार्वजनिक रूपमा चर्चा भएको टीडीएस विवरणसँग सम्बन्धित सम्पूर्ण कागजात, भुक्तानी विवरण, बिल/बिजक, आपूर्तिकर्ताको विवरण, प्यान/भ्याट, खरिद निर्णय, कोटेसन तथा टेन्डरसम्बन्धी कागजात र भुक्तानी स्वीकृति नियमअनुसार सार्वजनिक गर्न विद्यार्थीहरूले माग गरेका छन् ।

त्यसैगरी, आन्तरिक स्रोतबाट नियुक्त कर्मचारी तथा जनशक्तिको नियुक्ति सूचना, पद, संख्या, योग्यता, छनोट प्रक्रिया, नियुक्ति निर्णय, मासिक पारिश्रमिक र हालसम्म भएको कुल भुक्तानी विवरण सार्वजनिक गर्न माग गरिएको छ । आवश्यक जनशक्ति भएमा खुला तथा प्रतिस्पर्धात्मक प्रक्रियाको आधारसमेत स्पष्ट गर्न समितिले भनेको छ ।

क्याम्पसमा लिइने सीएलसी शुल्क प्रतिलिपि तथा ३०० बाट ५०० रुपैयाँ पुर्‍याइएको निर्णयको आधार, स्वीकृति, लागू मिति र शुल्कबाट प्राप्त रकमको आय–व्यय विवरण विद्यार्थीसमक्ष सार्वजनिक गर्न पनि माग गरिएको छ ।

समितिले क्याम्पस प्रमुख नियुक्त भएको मितिदेखि हालसम्मको आम्दानी–खर्च, आन्तरिक स्रोत, विद्यार्थी शुल्क, कर्मचारी पारिश्रमिक, खरिद, निर्माण तथा अन्य प्रमुख खर्चको विवरण पारदर्शी रूपमा सार्वजनिक गर्न माग गरेको छ ।

यसबाहेक क्याम्पसको शैक्षिक प्राथमिकता, विद्यार्थी संख्या, प्राविधिक कार्यक्रम, शिक्षक व्यवस्थापन, प्रयोगशाला तथा पूर्वाधार सुधारसम्बन्धी आगामी योजना विद्यार्थी र सरोकारवालासमक्ष सार्वजनिक गर्न माग गरिएको छ ।

संयुक्त विद्यार्थी संघर्ष समितिले मागहरू कुनै व्यक्तिलाई दोषी ठहर गर्ने उद्देश्यले नभई सार्वजनिक शैक्षिक संस्थाको स्रोत, विद्यार्थीबाट उठेको शुल्क तथा अन्य आम्दानीको प्रयोगबारे सम्बन्धित कागजात र तथ्य सार्वजनिक हुनुपर्ने उद्देश्यले उठाइएको जनाएको छ ।

समितिले आफूहरूले उठाएका विषयमा यथाशीघ्र लिखित जवाफ दिनुका साथै आवश्यक कागजात सार्वजनिक गर्न क्याम्पस प्रशासनसँग आग्रह गरेको छ ।