मधेशसहित देशभर भारी वर्षाको चेतावनी, असोज ९ देखि ११ गतेसम्म सतर्क रहन आग्रह

न्यूज ब्यूरो, जनकपुरधाम । मधेश प्रदेशसहित देशका विभिन्न भागमा असोज ९ गते शुक्रबारदेखि असोज ११ गते आइतबारसम्म भारीदेखि अति भारी वर्षा हुनसक्ने भन्दै जल तथा मौसम विज्ञान विभागले सर्वसाधारणलाई विशेष सतर्कता अपनाउन आग्रह गरेको छ ।

विभागका अनुसार बंगालको खाडीमा विकसित न्यून चापीय प्रणाली शक्तिशाली बन्दै पश्चिम–उत्तरपश्चिमतर्फ सर्ने क्रममा रहेकाले देशभर वर्षाको गतिविधि बढ्ने सम्भावना रहेको छ ।

पूर्वानुमानअनुसार गण्डकी र लुम्बिनी प्रदेशका केही स्थानमा भारीदेखि धेरै भारी तथा एक–दुई स्थानमा अति भारी वर्षा हुनसक्नेछ । कोशी, बागमती, मधेश र सुदूरपश्चिम प्रदेशका थोरै स्थानमा समेत भारीदेखि धेरै भारी वर्षाको सम्भावना रहेको विभागले जनाएको छ ।

त्यस्तै, कर्णाली प्रदेशका केही स्थानमा भारी वर्षा तथा हिमाली क्षेत्रमा भारी हिमपात हुनसक्ने पूर्वानुमान गरिएको छ ।

भारी वर्षाका कारण बाढी, पहिरो, भू–क्षय तथा गेग्रान बहावको जोखिम बढ्नसक्ने भएकाले नदी तथा खोलाको किनार, डुबानको जोखिम भएका क्षेत्र र पहिरोको जोखिमयुक्त स्थानमा अनावश्यक आवतजावत नगर्न विभागले आग्रह गरेको छ ।

वर्षाका कारण सडक तथा हवाई यातायात, कृषि, पर्यटन र निर्माणका गतिविधिसमेत प्रभावित हुनसक्ने भएकाले आवश्यक सावधानी अपनाउन विभागले सर्वसाधारणलाई अनुरोध गरेको छ ।