मधेशका अस्पतालमा ‘लुट’ र लापरवाहीको आरोप, युवा सञ्जालले दियो १५ दिने अल्टिमेटम
प्रदेशभर सञ्चालित अस्पताल, क्लिनिक तथा नर्सिङ होमको दर्ता, अनुमति र नवीकरणको नियमित अनुगमन गरी मापदण्ड पूरा नगरेका तथा बिना अनुमति सञ्चालित स्वास्थ्य संस्थामाथि कारबाही गर्नुपर्ने माग पनि ज्ञापनपत्रमा उल्लेख छ ।

२०८३ भदौ ३० मंगलबार, दिउँसो ४:०८ बजे२ मिनेट पढाइ
न्यूज ब्यूरो, जनकपुरधाम । मधेश प्रदेशका सरकारी तथा निजी अस्पतालमा उपचारका नाममा लापरवाही, अनियमितता र बिरामीमाथि आर्थिक भार थोपर्ने प्रवृत्ति बढेको आरोप लगाउँदै मधेश युवा सञ्जालले प्रदेश सरकारलाई १५ दिने अल्टिमेटम दिएको छ ।
सञ्जालले मंगलबार मधेश प्रदेशका स्वास्थ्य तथा जनसङ्ख्या मन्त्रीलाई ज्ञापनपत्र बुझाउँदै प्रदेशको स्वास्थ्य सेवा प्रणालीमा देखिएका समस्या तत्काल समाधान गर्न माग गरेको हो ।
ज्ञापनपत्रमा धनुषाको प्रादेशिक अस्पतालमा नवजात शिशुको मृत्यु, सप्तरीको राजविराजस्थित गजेन्द्र नारायण सिंह अस्पतालमा आर्थिक अभावका कारण सुत्केरी महिला अस्पतालबाहिरै सुत्केरी हुनुपरेको घटना तथा जनकपुरधामस्थित मुस्कान अस्पतालमा पित्तथैलीको शल्यक्रियापछि बिरामीको मृत्यु भएको घटनाप्रति गम्भीर ध्यानाकर्षण गराइएको छ ।
सञ्जालले यी घटनासहित प्रदेशका स्वास्थ्य संस्थामा देखिएका समस्या छानबिन गरी दोषीमाथि कारबाही गर्नुपर्ने माग गरेको छ ।
सञ्जालका १३ बुँदे मागमध्ये प्रमुख रूपमा प्रादेशिक अस्पताल जनकपुरधाम, गजेन्द्र नारायण सिंह अस्पताल राजविराज र मुस्कान अस्पतालमा भएका गम्भीर घटनाको निष्पक्ष तथा विशेष छानबिन गर्नुपर्ने माग छ ।
त्यस्तै गरिब, विपन्न, असहाय तथा गर्भवती बिरामीलाई आर्थिक अभावकै कारण उपचारबाट वञ्चित हुन नदिन प्रभावकारी व्यवस्था गर्नुपर्ने माग गरिएको छ ।

















टिप्पणी
आफ्नो विचार राख्न साइन इन गर्नुहोस्।
लोड हुँदै…