‘आफ्नै भाइसँग विवाह गरेर अमेरिका ल्याएको’ आरोप , इल्हान ओमरमाथि DHS को अनुसन्धान

न्यूज ब्यूरो, जनकपुरधाम । अमेरिकाको होमल्यान्ड सेक्युरिटी विभाग (DHS) ले डेमोक्रेटिक पार्टीकी सांसद इल्हान ओमरको आप्रवासन इतिहासबारे अनुसन्धान गरिरहेको बताइएको छ । अमेरिकी गृह सुरक्षा सचिव मार्कवेन मुलिनले ओमरले आफ्नो भाइसँग विवाह गरेर उनलाई अमेरिका ल्याउन सहयोग गरेको आरोप लगाउँदै यस विषयमा संघीय अनुसन्धान जारी रहेको बताएका छन् ।

मुलिनले रिपब्लिकन नेसनल कन्भेन्सनका क्रममा रूढिवादी टिप्पणीकार बेनी जोन्सनसँगको कुराकानीमा ओमरको पारिवारिक आप्रवासन इतिहासमाथि समेत अनुसन्धान भइरहेको बताएका हुन् । उनका अनुसार अनुसन्धान विवाहसम्बन्धी आरोपमा मात्र सीमित नहुन सक्ने र ओमरको परिवार अमेरिका प्रवेश गरेको प्रक्रियामा अन्य सम्भावित गैरकानुनी गतिविधि भए–नभएको समेत हेरिन सक्नेछ ।

ओमरले सन् २००९ मा बेलायती नागरिक अहमद नूर सईद एल्मीसँग कानुनी विवाह गरेकी थिइन् । यही विवाहलाई लिएर वर्षौंदेखि एल्मी ओमरका भाइ भएको र उनलाई अमेरिका ल्याउने उद्देश्यले विवाह गरिएको आरोप लाग्दै आएको छ । ओमरले भने यो आरोप अस्वीकार गर्दै आएकी छन् ।

यो आरोप सन् २०१९ मा अमेरिकी राजनीतिक वृत्तमा व्यापक रूपमा चर्चामा आएको थियो । तत्कालीन राष्ट्रपति डोनाल्ड ट्रम्पसहित रिपब्लिकन नेताहरूले ओमरमाथि अनुसन्धान गर्नुपर्ने माग गरेका थिए । तर अहिलेसम्म सार्वजनिक रूपमा उपलब्ध प्रमाणले एल्मी वास्तवमै ओमरका जैविक भाइ हुन् वा उनीहरूको विवाह आप्रवासन ठगीका लागि गरिएको थियो भन्ने कुरा निर्णायक रूपमा पुष्टि गरेको छैन । अमेरिकी सञ्चारमाध्यमका पुराना अनुसन्धानहरूले ओमरको विवाह र सम्बन्धविच्छेदको समयरेखामा प्रश्न उठाए पनि भाइ–बहिनीको सम्बन्ध प्रमाणित गर्न सकेका थिएनन् ।

DHS ले भने अनुसन्धानबारे विस्तृत प्रमाण वा अनुसन्धानमा प्रयोग भइरहेका कागजात सार्वजनिक गरेको छैन । विभागका प्रवक्ताले जारी अनुसन्धानबारे टिप्पणी नगर्ने नीति रहेको बताउँदै ‘कांग्रेसका सदस्यसहित कोही पनि कानुनभन्दा माथि नभएको’ बताएका छन् ।

मुलिनले अनुसन्धानबाट ओमरले आफ्नो आप्रवासन वा अमेरिकी नागरिकता प्रक्रियामा जानाजानी झूट बोलेको प्रमाणित भए कानुनी कारबाहीको सम्भावना रहने संकेत दिएका छन् । तर अहिलेसम्म ओमरमाथि यस आरोपमा कुनै अदालतबाट दोषी ठहर वा आप्रवासन ठगीसम्बन्धी सार्वजनिक अभियोग भएको छैन ।

यस घटनाले ट्रम्प प्रशासन र ओमरबीचको लामो समयदेखिको राजनीतिक विवादलाई पुनः सतहमा ल्याएको छ । ओमर अमेरिकी राजनीतिमा ट्रम्पका कडा आलोचकका रूपमा चिनिन्छिन् भने ट्रम्पले पनि विगतदेखि नै उनलाई निशाना बनाउँदै आएका छन् ।