ईन्टरनेशनल प्रेस क्लबको प्रदेश अध्यक्षमा "प्रेम"

न्यूज ब्यूरो |
जनकपुरधाम, २८ साउन । जनकपुरधाममा इन्टरनेशनल प्रेस क्लव नेपालको प्रदेशस्तरीय कार्य समिति चयन भएको छ ।

इन्टरनेशनल प्रेस क्लवद्वारा आयोजित प्रदेश कार्य समिति विस्तार तथा सम्वाद कार्यक्रमबाट प्रदेश संयोजकमा कुलदीप दास प्रेमलाई सर्वसम्मतिबाट चयन गरिएको छ ।

आठवटै जिल्लाबाट दुईदुई जनालाई सदस्य बनाइ १७ सदस्यीय कार्य समिति चयन गरिएको हो ।

केन्द्रिय उपाध्यक्ष गणेश कुमार शर्माको अध्यक्षतामा भएको सम्वाद कार्यक्रमका प्रमुख अतिथि जनकपुर उपमहानगरपालिकाका मेयर लाल किशोर साहले पत्रकारिता एउटा चुनौती रहेकोले सत्यतथ्य समाचार सम्प्रेषण गरी जनताको विश्वास जित्नका लागि सबैमा आग्रह गरेका छन् ।

मेयर साहले मधेश आन्दोलनको क्रममा यहाँका पत्रकारहरुले देखाएको साहस धन्यवादको पात्र रहेको भन्दै सीमाक्षेत्रमा रहेको समस्याहरुलाई समेत उठाउनका लागि सबैमा आग्रह गरेका छन् ।

उनले नवगठित कार्यसमितिलाई सफलताको शुभकामना समेत व्यक्त गरेका छन । उनले पत्रकार राज्यकै चौथौ अंग मात्र होइन, समाजको आँखा समेत रहेकोले जनता र देशका लागि कलम चलाउनु पर्ने औल्याएका छन् ।

क्लबका बारा जिल्लाबाट अनिल कुमार पाण्डे,रौतहटबाट साबिर आलम,धनुषाबाट जितेन्द्र कुमार राम, स-संयोजक निभा झा ,महोत्तरीबाट बिजय लाल यादव,सर्लाहीबाट कुल्दिप साह,सिरहाबाट शुभनारायण कामति र सप्तरीबाट चन्दन कर्णलाई सर्वसम्मत जिल्ला संयोजक चयन गरिएको छ ।

समितिको सम्वाद कार्यक्रममा नेपाल भारत सहितका पत्रकारहरुको उपस्थिति रहेको थियो ।