सर्लाहीमा बँदेलको आक्रमणमा परी एक युवा किसानको मृत्यू

न्यूज ब्यूरो, सर्लाही । सर्लाहीबाट एक हृदयविदारक खबर आएको छ।

सर्लाहीमा बँदेलको आक्रमणबाट एक युवकको ज्यान गएको छ। जिल्लाको लालबन्दी नगरपालिका–१५ पिडखोल्सी निवासी ३२ वर्षीय दावा भनिने प्रेमबहादुर थिङको बँदेलको आक्रमणमा परी मृत्यु भएको प्रहरीले जनाएको छ।

घटना आइतबार साँझको हो। घर नजिकैको मकै बारीमा बँदेलले क्षति गरेपछि उनलाई धपाउन गएका थिङ बँदेलको पछि लाग्दै जंगलतर्फ पुगेका थिए। तर, पिडखोल्सीको जंगलमा पुगेपछि बँदेलले एक्कासी आक्रमण गर्दा उनी गम्भीर घाइते भएका थिए।

गम्भीर अवस्थामा रहेका उनलाई आफन्तले तत्काल उपचारका लागि लालबन्दीतर्फ लैजाँदै गरेका थिए। तर, दुर्भाग्यवश बाटोमै उनको मृत्यु भएको अस्थायी प्रहरी चौकी परवानीपुरका प्रहरी सहायक निरीक्षक उमाशंकर यादवले जानकारी दिएका छन्।

मृतकको शव पोस्टमार्टमका लागि प्रादेशिक अस्पताल मलंगवा पठाइएको छ।

घटनाको थप अनुसन्धानका लागि इलाका प्रहरी कार्यालय लालबन्दीबाट प्रहरी निरीक्षक वीरेन्द्र सिंह जोहारीको नेतृत्वमा ७ जनाको टोली खटिएको प्रहरीले जनाएको छ।