मधेश प्रदेशको आगामी बजेट 'जनमुखी र गौरवका योजना' मा केन्द्रित हुँदैछः अर्थमन्त्री यादब

न्यूज ब्यूरो, जनकपुरधाम । मधेश प्रदेशका अर्थमन्त्री महेश प्रसाद यादवले आगामी आर्थिक वर्ष २०८३/०८४ को बजेट जनमुखी र दीर्घकालीन प्रभाव पार्ने गौरवका योजनामा केन्द्रित हुने बताएका छन्। प्रदेश सभामा गरिएको सम्बोधनमा उनले विगतका टुक्रे योजनालाई निरुत्साहित गर्दै ठूला र प्रभावकारी योजनालाई प्राथमिकतामा राख्ने स्पष्ट संकेत दिएका हुन्।

अर्थमन्त्री यादवका अनुसार चालु आर्थिक वर्षमा बजेटको आकार अहिलेसम्मकै ठूलो भए पनि आय संकलन अपेक्षाअनुसार हुन सकेको छैन। चालु आर्थिक बर्ष हालसम्म करिब ४८ प्रतिशत मात्र आय प्राप्त भएको र वर्षको अन्त्यसम्म पनि अनुमानित लक्ष्यभन्दा धेरै कम राजस्व संकलन हुने देखिएको छ। यसले प्रदेशको वित्तीय अवस्थामा चुनौती सिर्जना गरेको उनले बताए।

यस अवस्थालाई मध्यनजर गर्दै सरकारले प्रशासनिक खर्च कटौती, अनावश्यक सामग्री खरिदमा नियन्त्रण तथा साना र कम प्राथमिकताका योजनालाई स्थगित गर्ने नीति लिएको छ। विशेषगरी १० लाख रुपैयाँभन्दा कमका नयाँ योजनाहरू रोक्का राखी, अधुरा, क्रमागत तथा विपद् व्यवस्थापनसँग सम्बन्धित योजनालाई मात्र प्राथमिकता दिइएको छ।

अर्थमन्त्री यादवले विगतमा रहेको अवण्डा बजेट प्रणालीलाई अन्त्य गर्दै अबदेखि बजेटमा स्पष्ट रूपमा योजनाहरू समावेश गरिने जानकारी दिए। यसले पारदर्शिता बढाउने र प्रदेश सभा सदस्यदेखि स्थानीय तहसम्म सबैलाई बजेटको वास्तविक स्वरूप बुझ्न सहज हुने विश्वास व्यक्त गरिएको छ।

त्यसैगरी, बजेट तर्जुमा प्रक्रियालाई सहभागीमूलक बनाउन बजेट क्यालेन्डर अनुसार समयमै तयारी सुरु गरिएको छ भने नयाँ खर्च मापदण्ड निर्देशिका लागू गरी मितव्ययी र प्रभावकारी खर्च प्रणाली विकास गर्ने तयारी गरिएको छ।

संघीय सरकारसँगको समन्वयमा देखिएका समस्या, विशेषगरी वित्तीय समानीकरण अनुदान र कार्यसम्पादन मूल्यांकनका केही सूचकहरू मधेश प्रदेशप्रति अन्यायपूर्ण रहेको भन्दै त्यसमा सुधारका लागि पहल गरिएको पनि उनले बताए। साथै अधुरा आयोजना सम्पन्न गर्न र आवश्यक स्रोत सुनिश्चित गर्न संघ सरकारसँग निरन्तर आग्रह गरिएको जानकारी दिए।

आयका नयाँ स्रोत पहिचान गर्ने क्रममा ढुङ्गा, गिट्टी, बालुवा निर्यातको कानुनी व्यवस्था तथा उद्योग क्षेत्रसँग सहकार्य गरेर प्रदेशको राजस्व बढाउने प्रयास भइरहेको उनले उल्लेख गरे।

समग्रमा अर्थमन्त्री यादवले आर्थिक चुनौतीबीच पनि अनुशासित, पारदर्शी र जनमुखी बजेट निर्माण गर्दै मधेश प्रदेशको समृद्धि हासिल गर्ने प्रतिबद्धता व्यक्त गरेका छन्।

अर्थमन्त्री यादवले केही सँचारमाध्यममा आफूबारे र मन्त्रालयबारे मिथ्या, कपोकल्पित समाचारहरु प्रकाशन भएकोप्रति आपत्ति जनाउँदै समाचारमा कुनै सत्यता नरहेको पनि बताए । पत्रकारहरुलाई मन्त्रालयमा बोलाएर गरिएको पत्रकार सम्मेलन गोष्ठीमा अर्थमन्त्री यादवले देशको चोथौँ अंश सम्वेदनशिल हुनुपर्ने धारणा राखे ।

उनले आगामी आर्थिक बर्षमा आउने योजनाहरु देशको उत्कृष्ट योजनाहरुमा आउने जिकिरि गरे । उनले टुक्रे योजनाहरुलाई निरुत्साहित गर्नको लागि मधेश सरकारले आर्थिक रुपमा मितव्ययिता अपनाउन सुरु गरेको बताए ।