अब सरकारी कार्यालयहरु बिहान ९ देखि साँझ ५ बजेसम्म हुने खुल्ला

न्यूज ब्यूरो, जनकपुरधाम । इन्धन संकट र बढ्दो खर्च नियन्त्रण गर्न नेपाल सरकारले ठूलो कदम चालेको छ। आइतबार बसेको मन्त्रिपरिषद् बैठकले सरकारी कार्यालयको समय परिवर्तनसँगै हप्तामा दुई दिन सार्वजनिक बिदा दिने निर्णय गरेको हो।

यसका साथै, अब शैक्षिक संस्थाबाहेकका सबै सरकारी कार्यालय बिहान ९ बजेदेखि साँझ ५ बजेसम्म सञ्चालन हुनेछन्। यसअघि १० बजे खुल्ने कार्यालय अब एक घण्टा अगाडि खोलिनेछ, ताकि कामकाजमा कुनै असर नपरोस्।

सरकारका प्रवक्ता तथा शिक्षामन्त्री सस्मित पोखरेलले भने, “शैक्षिक संस्थाबाहेकका कार्यालयहरू ९ देखि ५ बजेसम्म सञ्चालन हुने व्यवस्था गरिएको छ।”

सरकारले अबदेखि शनिबार र आइतबार दुबै दिन सार्वजनिक बिदा दिने निर्णय गरेको छ। यो नियम सरकारी कार्यालयसँगै शैक्षिक संस्थामा पनि लागू हुनेछ।

किन लिइयो यस्तो निर्णय ?
विश्व बजारमा पेट्रोलियम पदार्थको मूल्यमा उतारचढाव र आपूर्तिमा देखिएको समस्या मुख्य कारण हो। इन्धन खपत घटाउने लक्ष्यका साथ सरकारले ‘टु(डे अफ’ मोडेल परीक्षणका रूपमा लागू गरेको हो।

के यो व्यवस्था दीर्घकालीन हुन्छ कि अस्थायी ?
सरकारको यो नयाँ प्रयोग सफल हुन्छ कि हुँदैन, त्यसतर्फ सबैको ध्यान केन्द्रित भएको छ।