धनुषा १ः उम्मेदवारी खारेज भएका किशोरी साहको मुद्दामा आज रिट उपर सुनुवाई हुदैँ

न्यूज ब्यूरो, जनकपुरधाम । धनुषा निर्वाचन क्षेत्र नं. १ का राष्ट्रिय स्वतन्त्र पार्टीका उम्मेदवार किशोरी साह कमलको उम्मेदवारी खारेजीविरुद्ध परेको रिटमा आज सुनुवाई हुने भएको छ ।

सर्वोच्च अदालतमा परेको रिटपछि आज फागुन २५ गतेका लागि सुनुवाई तारेख पर्चा पाएका थिए । चुनावको दुई दिन अगाडी निर्वाचन आयोगले साहलाई अयोग्य उम्मेदवार ठहर गर्दै उम्मेदवारी खारेज गरिदिएको हो ।

कर्जा सूचना केन्द्रको कालोसूचिमा परेका किशोरी साहलाई मुद्दा परेपछि उनलाई अयोग्य घोषित गरेको थियो । फागुन १० गते परेको मुद्दामा उनलाई एक साता स्पष्टिकरण पेश गर्न भनेपछि उचित जवाफसहित कालोसूचिमा नरहेको भनेर प्रमाण पेश गर्न नसकेपछि आयोगले उनको उम्मेदवारी खारेज गरेको थियो ।

उम्मेदवारी खारेज भएपछि उनले आयोगविरुद्ध सर्वोच्च अदालतमा रिट दायर गरेका थिए । अदालतले निर्वाचनपछि २५ गतेको लागि रिटमाथि सुनुवाईको तारेख दिएको थियो ।

धनुषा निर्वाचन क्षेत्र नं. १ को मतगणना सम्पन्न भएपनि मतपरिणाम घोषणा नगर्न आयोगले पत्र पठाएको थियो । यसअघि आयोगका आयुक्तले उम्मेदवारी खारेज भएपछि सो छापमा पर्ने मत स्वतः बदर मानिने घोषणा गरेका थिए ।

यता, उनका समर्थकहरुले भने जनमतको कदर हुनुपर्ने भन्दै अत्यधिक मत परेकोले निर्वाचित घोषित गर्न माग उठाउँदै आएका हुन् । आयोगले दोस्रो सबभन्दा अघिक मत हुने उम्मेदवारलाई निर्वाचित घोषित गर्ने बताएको थियो ।