गगन थापालाई अमरेश सिंहको खुल्ला पत्र, फेसबुकमा भाईरल

न्यूज ब्यूरो, सर्लाही । भर्खरै सम्पन्न आसन्न प्रतिनीधिसभा निर्वाचनमा सर्लाही–४ का निर्वाचित प्रतिनिधि डा. अमरेश कुमार सिंहले नेपाली काँग्रेसका सभापति गगन कुमार थापालाई सम्बोधन गर्दै सामाजिक सञ्जाल फेसबुकमार्फत लेखेको खुल्ला पत्र यतिबेला व्यापक रूपमा भाइरल भइरहेको छ।

फेसबुकमा सार्वजनिक गरिएको उक्त स्टाटसमा सिंहले सर्लाहीमा आएर चुनाव लडेकोमा थापालाई धन्यवाद दिएका छन्। तर उनले थापामाथि “भ्रष्ट समूहद्वारा आयातित उम्मेदवार” भएको आरोपसमेत लगाएका छन्।

सिंहले आफ्नो स्टाटसमा लेखेका छन् कि यदि गगन थापा आफैँको पहलमा चुनाव लड्न आएको भए चुनाव अझ रोचक हुने थियो। तर भ्रष्ट समूहको प्रभावमा आएर उम्मेदवार बनेको आरोप उनले लगाएका छन्।

त्यसैगरी उनले चुनावी अभियानका क्रममा आफूविरुद्ध व्यक्तिगत तथा पारिवारिक जीवनबारे टिप्पणी गराइएको दाबी गर्दै राजनीति सिद्धान्त र एजेन्डामा आधारित हुनुपर्ने धारणा व्यक्त गरेका छन्।

उनले लेखेका छन् कि चुनावका तीतो अनुभवलाई अब पछाडि छाडेर देश निर्माणमा सहकार्य गर्न सकिने सम्भावना खुला रहेको छ।

स्टाटसमा उनले हालको राजनीतिक परिस्थितिमा रास्वपाले भ्रष्टाचारविरुद्ध जनमत प्राप्त गरेको उल्लेख गर्दै आगामी दिनमा स्वच्छ राजनीति आवश्यक रहेको बताएका छन्।

सिंहले गगन थापालाई लक्षित गर्दै “तपाईंले कांग्रेस परिवर्तन गर्न खोज्नुभयो तर आफू परिवर्तन हुन सक्नुभएन” भन्ने टिप्पणीसमेत गरेका छन्। साथै उनले भविष्यमा गगन थापाले स्वच्छ र पारदर्शी राजनीति गर्ने अपेक्षा व्यक्त गर्दै आफ्नो पत्र टुंग्याएका छन्।

सामाजिक सञ्जालमा सार्वजनिक भएको यो स्टाटसले राजनीतिक वृत्तमा नयाँ बहस सुरु गरेको छ। समर्थक र आलोचक दुवै पक्षबाट प्रतिक्रिया आइरहेका छन् भने प्रयोगकर्ताहरूले उक्त पोस्टलाई व्यापक रूपमा शेयर गरिरहेका छन्।