रास्वपा कर्णाली प्रदेशकी संस्थापक महामन्त्री र जिल्ला सभापति पार्टी छाडेर काँग्रेसमा प्रवेश

न्यूज ब्यूरो, जनकपुरधाम । कमला नगरपालिकाले पहिलो पटक वस्तीस्तरबाटै योजना तर्जुमा गर्ने अभ्यास सुरु गरेको छ। यस प्रक्रियामार्फत स्थानीय आवश्यकताका आधारमा प्राथमिकता निर्धारण गर्दै ४९ करोड रुपैयाँभन्दा बढीको बजेट सुनिश्चित गरिएको नगरपालिकाले जनाएको छ।

गत चैत्त ३० गते सम्पन्न आर्थिक बर्ष २०८२/०८३ को नवौं नगरसभाबाट ४९ करोड बढीको बजेट अनुमान गरिएको नगर प्रमुख विशेश्वर प्रसाद यादवले जानकारी दिए । नगर प्रमुखका अनुसार यसअघि योजना निर्माण मुख्यतः माथिल्लो तहबाट हुने गरेकामा यसपटक प्रत्यक्ष रूपमा टोल तथा वस्तीस्तरबाट सुझाव संकलन गरी योजनाहरू तयार पारिएको हो। यसले स्थानीय बासिन्दाका वास्तविक आवश्यकता सम्बोधन गर्न सहयोग पुग्ने विश्वास व्यक्त गरिएको छ।

वस्तीस्तरबाट संकलित योजनाहरूलाई प्राथमिकता निर्धारण गरी पूर्वाधार विकास, शिक्षा, स्वास्थ्य, खानेपानी तथा सरसफाइ लगायतका क्षेत्रमा बजेट विनियोजन गरिएको छ। यस प्रक्रियाले पारदर्शिता र जनसहभागिता बढाउने अपेक्षा गरिएको यादवको भनाइ छ।

कमला नगरपालिकाको ९ वटै वडाध्यक्ष, सबै वडासदस्य, कार्यपालिका सदस्य तथा कर्मचारीहरुको रोहबरमा सम्पन्न नगरसभाबाट यसपाली कृषि विद्युतिकरणलाई मुख्य प्राथािमकतामा राखिएको जनाइएको छ । ९ वटै वडामा कृषि विद्युतियकरण नगरस्तर र वडास्तरबाट समेत हुने लक्ष्य लिएको छ । 

९ बर्षको स्थानीय सरकारमा कमला नगरपालिकाले पहिलो पटक वस्तीस्तर योजना तर्जुमाको लागि पत्राचार गरी योजना संकलन गरेको जनाइएको छ । जसमा वडा नं. ३ र ८ मा सार्वजनिक सूचना आह्वान गरी योजना संकलन गरिएको हो । 

स्थानीयवासीहरूले पनि यस पहललाई सकारात्मक रूपमा लिँदै आफ्ना आवश्यकता प्रत्यक्ष रूपमा योजनामा समेटिनु उपलब्धिमूलक भएको बताएका छन्। उनीहरूका अनुसार यसले विकास निर्माणका कामहरू प्रभावकारी र दिगो बन्ने विश्वास गरिएको छ।

कमला नगरपालिकाले आगामी वर्षहरूमा पनि यस अभ्यासलाई निरन्तरता दिने योजना बनाएको छ, जसबाट समावेशी र दिगो विकासमा टेवा पुग्ने अपेक्षा गरिएको छ।