रास्वपालाई थप झटकाः रास्वपा धनगढीका संस्थापक सभापति बिष्टले पनि त्यागे पार्टी

न्यूज ब्यूरो, धनगढी । ईश्वरी बिष्टले राष्ट्रिय स्वतन्त्र पार्टी (रास्वपा) परित्याग गरेका छन्। धनगढी उपमहानगरपालिकाका संस्थापक नगर सभापति समेत रहेका बिष्टले पार्टीको साधारण सदस्यबाट समेत अलग हुने गरी राजीनामा दिएको घोषणा गरेका हुन्।

२०७९ सालको प्रतिनिधि सभा सदस्य निर्वाचनमा कैलाली–५ बाट प्रत्यक्ष उम्मेदवार बनेका उनले पार्टीको केन्द्रीय कार्यालय, काठमाडौंलाई सम्बोधन गर्दै राजीनामा पत्र बुझाएको जानकारी दिएका छन्। उक्त निर्वाचनमा उनी सुदूरपश्चिम प्रदेशमा रास्वपाबाट दोस्रो बढी मत प्राप्त गर्ने उम्मेदवार बनेका थिए।

बिष्टले पार्टीले अघि सारेको युवा राजनीतिलाई प्राथमिकता दिने, योग्य व्यक्तिलाई छनोट गर्ने तथा नातावाद, आशीर्वाद र आर्थिक प्रभावभन्दा माथि उठेर प्राइमरी प्रणालीमार्फत उम्मेदवार चयन गर्ने आदर्शबाट प्रभावित भई पार्टीमा आबद्ध भएको उल्लेख गरेका छन्। तर पछिल्लो समय पार्टीको पद्धति, निर्णय प्रक्रिया र कार्यशैली स्थापना कालीन मूल्य, विधान तथा सार्वजनिक प्रतिबद्धताभन्दा विपरीत गएको अनुभूति भएको उनको भनाइ छ।

उनका अनुसार संगठनमा समर्पित नेता–कार्यकर्ताको उचित मूल्यांकन नभएको, विधि–विधान विपरीत गतिविधि बढ्दै गएको तथा निर्णय प्रक्रियामा पारदर्शिता कमजोर बन्दै गएको अवस्थाले आफ्नो आत्मसम्मान र राजनीतिक मूल्यप्रति प्रश्न उठाएको छ। यही परिस्थितिमा मौन बस्न नसक्ने निष्कर्षसहित पार्टी परित्याग गर्ने निर्णय गरेको उनले बताएका छन्।

आगामी प्रतिनिधि सभा निर्वाचनका लागि कैलाली–५ मा रास्वपाबाट उम्मेदवार बन्न इच्छुक रहेका बिष्टलाई पार्टीले टिकट नदिई आनन्द बहादुर चन्दलाई उम्मेदवार बनाएपछि उनी असन्तुष्ट बनेका थिए। त्यसपछि उनले स्वतन्त्र उम्मेदवारी दिएका थिए।

२०७९ सालको निर्वाचनमा रास्वपाका उम्मेदवारका रूपमा प्रतिस्पर्धा गरेका बिष्टले कुल तीन हजार ४०५ मत प्राप्त गरेका थिए।