रास्वपा घण्टीका उम्मेदवार किशोरी साह कमल CIB को 'ब्लैक लिस्ट' मा, उम्मेदवारी खारेज हुने खतरा

न्यूज ब्यूरो, जनकपुरधाम । रवि लामिछाने नेतृत्वको राष्ट्रिय स्वतन्त्र पार्टी (रास्वपा) का उम्मेदवार किशोरी साह कमल कर्जा सूचना केन्द्र (CIB- Credit Information Bureau of Nepal) को कालोसूचिमा रहेको तथ्य फेला परेको छ ।

धनुषा निर्वाचन क्षेत्र नं. १ बाट रास्वपा (घण्टी) बाट उम्मेदवारी दिएका किशोरी साह कमलको नाम कर्जा सूचना केन्द्रको कालोसूचिमा रहेको फेला परेको छ । कमल निर्माण सेवा प्रा.लि.का शेयर होल्डर रहेका किशोरी साह कमललाई चेक बाउन्स मुद्दा परेपछि बैँकको कालो सूचिमा परेका हुन् ।

कर्जा सूचना केन्द्रको २०८० बैशाख १७ गतेदेखि नै कालो सूचिमा राखेको पाईएको छ । कर्जा सूचना केन्द्रको फागुन ५ गतेसम्मको अद्ययावधिक रिपोर्ट र कालोसूचीको नामसूचि अनुसार कमला निर्माण सेवा प्रा.लि.का शेयर होल्डर किशोरी साह कमलको नाम ४ ठाउँमा रहेको छ । सो मितिको सूचिमा उनकी श्रीमति अँजिला साह र किशोरी साह कमलको सँयुक्त नाम ब्लैकलिस्टमा देखिएको छ ।

क्रम सँख्या ३८६३५ र ब्लैकलिस्ट नं. ६४२४५ मा सुरुमा कालोसूचिमा परेका छन् । निरन्तर सो कालोसूचिमा रहँदै आएका छन् । त्यसपछि २०८० असोज १७ गतेमा कमल निर्माण सेवाको तर्फबाट उम्मेदवार किशोरी साह कमल र सँजीत कुमार साहको नाम उल्लेख छ । क्रम सँख्या ५२७४६, ५२७५० को ब्लैकलिस्ट नं. क्रमशः ८६३९१ र ८६३९६ मा ब्लैकलिस्ट परेका छन् ।

मिति २०८० असोज २१ गतेमा कमल निर्माण सेवा प्रा.लि.बाट किशोरी साह कमल र राजकिशोर महासेठको नाम उल्लेख छ । क्रम सँख्या ५३१०४ मा ब्लैकलिस्ट नं. ८६९३० मा ब्लैकलिस्टमा परेका छन् ।

कर्जा सूचना केन्द्रका प्रवक्ता बिजय कुँवरका अनुसार कर्जा सूचिमा नाम रहेका व्यक्ति कर्जा सूचना केन्द्रको ब्लैकलिस्टको अधिकारीक भएको पुष्टि गरे । उनले भने, “विभिन्न समयमा कालोसूचिको तथ्याँक अपडेट हुने गरेकोमा अझै कालो सूचिमा देखिएपछि कालोसूचि हो भनेर बुझनुपर्दछ । यो अधिकारिक हो ।”

धनुषा निर्वाचन क्षेत्र नं. १ को निर्वाचन अधिकृतको कार्यालयका एक कर्मचारीले कालोसूचिमा परेपछि उजुरीको आधारमा कारवाही प्रक्रिया अघि बढने बताए । कुनै उम्मेदवार वा कोही अन्यले स प्रमाणसहित उजुरी गरेमा ७ दिने स्पष्टिकरण सोधेर कारवाही प्रक्रिया थाल्ने बताए ।

प्रतितिति सभा सदस्य निर्वाचन निर्देशिका २०८२ को १६ मा रहेको उम्मेदवार अयोग्य ठहरिने परिच्छेदको (ज) मा “प्रचलित कानुन बमोजिम कालो सूचिमा रहेकोमा सो अवधीभर” उल्लेख छ । कालोसूचिमा रहेको पाइएमा उजुरीको आधारमा छानबिन गरी उम्मे्दवार अयोग्य ठहरिने उल्लेख छ ।

यता, घण्टीका उम्मेदवार किशोरी साह कमललाई ऋण दिएका साहुले फागुन १० गतेभित्र रकम फिर्ता नगरे निर्वाचन कार्यालयमा उजुरी दिने चेतावनी दिएका छन् । नाम नखोल्ने शर्तमा साहुले १ करोड २५ लाखको चेक बाउन्स भएको बताएको छ ।

कानुनका जानकारहरुले किशोरी साह कमलमाथि उजुरी परे उम्मेदवारी खारेज हुने सम्भवना अधिक रहेको बताएको छ । ‘कालो सूचीमा परेका व्यक्तिहरुको उम्मेदवारी दर्ता भएकै बेला पनि रद्द हुने प्रावधान छ ।’ युवा कानुन व्यवसायी दिपक केसीले भने, कालो सूचीमा रहेका उम्मेदवार विरुद्ध स–प्रमाण उजुरी निर्वाचन कार्यालयमा परे उम्मेदवारी रद्द हुन सक्छ । उम्मेदवारी रद्द हुने खतराको घण्टी बज्न थालेपछि उम्मेदवार अहिले सकसमा देखिएको छ ।

निर्देशिकाको १७ मा उम्मेदवारको अयोग्यता सम्बन्धि निर्णय गर्ने प्रक्रियामा उजुरी परेपछि स्पष्टिकरण, स्पष्टिकरण सोध्ने उल्लेख छ । यसको लागि सम्बन्धित निर्वाचन क्षेत्रको निर्वाचन अधिकृतले अयोग्यता सम्बन्धी निर्णय गर्न सक्ने उल्लेख छ ।

यद्यपी, कर्जा सूचना केन्द्रकै कालोसूचिमा परेको आधारमा उम्मेदवार स्वतः खारेज हुने कुनै बुँदा उल्लेख छैनन् । ऐन कानुनमा समेत यसबारे स्पष्ट उल्लेख देखिदैनन् ।

नेकपा एमालेबाट प्रदेश सभामा निर्वाचित भएका किशोरी साह कमल एमाले छाडेर जनमतमा गएका थिए । पुनः जनमत पार्टी छाडेर एमालेमा प्रवेश गरे । यसपाली पुनः एमाले छाडेर राष्ट्रिय स्वतन्त्र पार्टीबाट उम्मेदवार बनेका छन् ।

विभिन्न पार्टीबाट उनलाई टिकट दिने गरेको छ । पार्टी बदलिएपनि उम्मेदवार भने उही रहने गरेका छन् ।