आजदेखि उम्मेदवारको प्रचार प्रसार सुरु, १८ गतेसम्म मात्रै चुनावी प्रचार गर्न पाइने

न्यूज ब्यूरो, जनकपुरधाम । निर्वाचन आयोगले प्रतिनिधिसभा सदस्य निर्वाचनका उम्मेदवार तथा राजनीतिक दललाई फागुन ४ गतेदेखि १८ गतेसम्म मात्रै चुनावी प्रचारप्रसार गर्न अनुमति दिएको छ। फागुन २१ गते हुने निर्वाचनलाई लक्षित गर्दै जुलुस, आमसभा, घरदैलो र सञ्चारमाध्यममार्फत प्रचार यही अवधिमा मात्र गर्न पाइने आयोगले जनाएको छ।

आयोगका कार्यवाहक प्रमुख निर्वाचन आयुक्त रामप्रसाद भण्डारीले प्रचारका क्रममा कसैलाई धम्की, दबाब, आर्थिक प्रलोभन वा सामाजिक बहिष्कारजस्ता गतिविधि नगर्न निर्देशन दिएका छन्। हातहतियार प्रदर्शन, चरित्रहत्या, डर–त्रास फैलाउने तथा मतदान अधिकारमा अवरोध गर्ने काम पनि निषेध गरिएको छ।

आचारसंहिता अनुसार सीमित आकारको पर्चा वितरणबाहेक पोस्टर, ब्यानर, भित्तेलेखन तथा सार्वजनिक स्थलमा प्रचार सामग्री टाँस्न पाइने छैन। मतदानभन्दा ४८ घण्टा अघिदेखि मतगणना सकिएसम्म सबै प्रकारका प्रचार गतिविधि पूर्ण रूपमा बन्द गर्नुपर्ने व्यवस्था गरिएको छ।

सरकारी सवारीसाधन, कर्मचारी वा सार्वजनिक स्रोत प्रयोग गर्न नपाइने तथा प्रचारका लागि प्रयोग हुने सवारी अनिवार्य रूपमा निर्वाचन अधिकृतको अनुमति लिएर मात्र सञ्चालन गर्नुपर्ने आयोगले स्पष्ट पारेको छ। साथै मतदाता परिचयपत्र कब्जा गर्ने वा निर्वाचन सामग्री दुरुपयोग गर्ने कार्य कानुनविपरीत हुने चेतावनी पनि आयोगले दिएको छ।