राष्ट्रिय स्वतन्त्र पार्टीका वरिष्ठ नेता बालेन्द्र शाहले आजै सप्तरी, सिरहा, धनुषा, महोत्तरीसम्म जनसम्पर्क कार्यक्रम गर्ने

न्यूज ब्यूरो, जनकपुरधाम । राष्ट्रिय स्वतन्त्र पार्टीका वरिष्ठ नेता बालेन्द्र शाह (बालेन) ले आज मंगलबार जनसम्पर्क तथा ‘घण्टी अभिवादन’ कार्यक्रम सञ्चालन गर्ने भएका छन्। पार्टीले सार्वजनिक गरेको कार्यक्रम तालिकाअनुसार बालेनले एकै दिनमा सप्तरी, सिरहा र महोत्तरीका विभिन्न स्थानमा पुगेर स्थानीय नागरिकसँग प्रत्यक्ष भेटघाट गर्नेछन्।

कार्यक्रमको पहिलो चरण सप्तरी जिल्लाबाट सुरु हुने छ। बिहान ८ः३० बजेदेखि सप्तकोशी नगरपालिका हुँदै कञ्चनरुप, हनुमाननगर, राजविराज, डाक्नेश्वरी नगरपालिका, बोदेबरसाइनलगायत स्थानमा घण्टी अभिवादन कार्यक्रम तय गरिएको छ। त्यसपछि सिरहाको भगवानपुर र नवराजपुर, सुखिपुर क्षेत्र हुँदै दिउँसो सिरहा बजार र आसपासका क्षेत्रमा जनसम्पर्क कार्यक्रम सञ्चालन गरिनेछ।

तेस्रो चरणमा धनुषा र सिरहा जोडने कमला पुलमा होल्ड गरिने कार्यक्रम रहेको छ । दिउँसो १ः३५ बजे कमला पुलमा होल्ड गरी तिनकोरियाको लागि निस्कने कार्यक्रम रहेको छ । त्यहाँबाट यदुकूहा, धनुषा हुँदै नगराईनसम्म पुग्ने कार्यक्रम रहेको छ ।

चौथो चरणमा महोत्तरी जिल्लाका विभिन्न स्थानहरू समेटिएका छन्। जलेश्वर, एकडारा, बलवा तथा बर्दिवाससम्म बालेनको जनसम्पर्क कार्यक्रम तय गरिएको छ।

राष्ट्रिय स्वतन्त्र पार्टीका अनुसार यस कार्यक्रमको उद्देश्य पार्टीको नीति, विचार र ‘घण्टी’ चुनाव चिन्हबारे आम नागरिकलाई जानकारी गराउनुका साथै स्थानीय समस्या, अपेक्षा र सुझाव प्रत्यक्ष रूपमा सुन्नु रहेको छ। पार्टीले जनताको सहभागिता र समर्थन बढाउने विश्वास व्यक्त गरेको छ।

पार्टीका स्थानीय नेता तथा कार्यकर्ताहरूले कार्यक्रमलाई सफल बनाउन तयारी तीव्र पारेका छन्। कार्यक्रममा सर्वसाधारण, युवा, व्यवसायी र नागरिक समाजका प्रतिनिधिहरूको उल्लेखनीय सहभागिता रहने अपेक्षा गरिएको छ।