सप्तरी ३ रास्वपा (घण्टी) का उम्मेदवार चौधरीमाथि भ्रष्टाचारको आरोप, अख्तियारले बोलायो

न्यूज ब्यूरो, सप्तरी । विद्यालय भवन निर्माण कार्यमा मिलेमतो गरी भ्रष्टाचार गरिएको उजुरी परेपछि अख्तियार दुरुपयोग अनुसन्धान आयोगले चौधरीसहित सम्बन्धित व्यक्तिहरूलाई बयानका लागि बोलाएको हो। चौधरी सोही विद्यालयका विद्यालय व्यवस्थापन समितिका अध्यक्षसमेत हुन्।

आयोगले गत मंगलबार सप्तरीको डाक्नेश्वरी नगरपालिकामा पत्राचार गर्दै उनीहरूलाई उपस्थित गराइदिन अनुरोध गरेको छ। आयोगको पत्रअनुसार डाक्नेश्वरी नगरपालिका–५ स्थित श्रीकान्त चन्द्र नमुना माध्यमिक विद्यालयको भवन निर्माणसँग सम्बन्धित अनुसन्धानका सिलसिलामा विद्यालय व्यवस्थापन समितिका अध्यक्ष अमरकान्त चौधरीसहितका व्यक्तिहरूलाई शुक्रबार बिहान १० बजे आयोगको अनुसन्धान शाखा नं. ४ (ख) मा उपस्थित हुन भनिएको छ।

अमरकान्त चौधरी पूर्वसांसद चन्द्रकान्त चौधरीका छोरा हुन्। उनी यसअघि तत्कालीन राष्ट्रिय जनता पार्टी .(राजपा) बाट राजनीतिमा सक्रिय थिए। पछिल्लो समय रास्वपामा प्रवेश गरेका चौधरीले सोही पार्टीबाट सप्तरी–३ मा प्रतिनिधिसभा सदस्यका लागि उम्मेदवारी दिएका छन्।

भ्रष्टाचारको आरोप लागेका अन्य व्यक्तिहरूमा तत्कालीन विद्यालय व्यवस्थापन समितिका पदाधिकारीहरू रामसागर मण्डल, सतेन्द्रकुमार मण्डल, रुञ्चीदेवी सदा, कविता सिंह, श्यामलादेवी मण्डल, दुखरण मण्डल, सुभाषकुमार साह र योगेन्द्रप्रसाद मेहता रहेका छन्।