प्रादेशिक अस्पताल सिरहाका तत्कालिन मेसु यादबसहित ८ जनामाथि भ्रष्टाचार मुद्दा, पदबाट निलम्बन

न्यूज ब्यूरो, सिरहा । अख्तियार दुरुपयोग अनुसन्धान आयोगले प्रादेशिक अस्पताल सिरहामा सेवा शुल्क संकलनमा अनियमितता गरी ३८ लाख ७७ हजार ७२४ रुपैयाँ ८३ पैसा हिनामिना गरेको अभियोगमा अस्पतालका मेसु नागेन्द्र यादवसहित आठ जनाविरुद्ध विशेष अदालत, काठमाडौंमा आरोपपत्र दायर गरेको छ।

अख्तियारका अनुसार अस्पतालमा मिलेमतोमा कर्मचारी नियुक्त गरी ओपीडीसहित विभिन्न बिलिङ काउन्टरबाट संकलन भएको राजस्व रकम राजस्व खातामा दाखिला नगरी लामो समयदेखि दुरुपयोग गरिएको उजुरीको अनुसन्धान गर्दा गम्भीर अनियमितता पुष्टि भएको हो।

अनुसन्धानका क्रममा आर्थिक वर्ष २०८०/०८१ मा अस्पतालका आठ वटा बिलिङ काउन्टरबाट संकलन भएको ३ करोड ८७ लाख ६६ हजार ९७४ रुपैयाँ ८३ पैसा राजस्व खातामा जम्मा हुनुपर्ने देखिए पनि अभिलेखअनुसार ३ करोड ४८ लाख ८९ हजार २५० रुपैयाँ मात्र दाखिला भएको पाइएको अख्तियारले जनाएको छ। बाँकी ३८ लाख ७७ हजार ७२४ रुपैयाँ ८३ पैसा हालसम्म दाखिला नगरी हिनामिना गरिएको देखिएको छ।

बिलिङ काउन्टरमा कार्यरत कर्मचारीहरूले आ–आफ्नो जिम्मामा संकलित रकम पूर्ण रूपमा दाखिला नगरेको पाइएको छ। अख्तियारका अनुसार अहेब श्याम कुमार मण्डलले २५ लाख ४७ हजार ४१७ रुपैयाँ १ पैसा, स.क.अ. सरस्वती कुमारी यादवले ५ लाख २ हजार ८१३ रुपैयाँ ७४ पैसा, स.क.अ. अजय कुमार मण्डलले ३ लाख ७९ हजार २१ रुपैयाँ ५० पैसा, स.क.अ. पुजा कुमारी यादवले २ लाख ८८ हजार २२९ रुपैयाँ ४० पैसा र स.क.अ. रोशन कुमार यादवले १ लाख ६४ हजार ६५९ रुपैयाँ ६८ पैसा दाखिला नगरेको देखिएको छ।

त्यसैगरी अस्पतालका तत्कालीन प्रमुख डा. नागेन्द्र प्रसाद यादव र डा. सरोज यादव, तत्कालीन प्रशासन प्रमुख अशोक कुमार सिंह तथा तत्कालीन लेखा प्रमुख अशोक कुमार यादवले बिलिङ सफ्टवेयरमार्फत संकलन र दाखिला रकमको निगरानी गर्न सक्ने अधिकार हुँदाहुँदै पनि बदनियतपूर्वक अनियमितता हुन दिएको अख्तियारको ठहर छ।

यस प्रकरणमा तत्कालीन लेखा प्रमुख रत्न प्रसाद मण्डलको मृत्यु भइसकेकाले फौजदारी सजाय माग नगरिए पनि उनले जीवित रहँदा गरेको भ्रष्टाचारबाट भएको बिगो रकम उनकी श्रीमती मुस्कान कुमारी मण्डलबाट असुल उपर गर्न मागदाबी लिइएको अख्तियारले जनाएको छ।

अख्तियारले सबै प्रतिवादीहरूमाथि भ्रष्टाचार निवारण ऐन, २०५९ बमोजिम कैद, जरिवाना र बिगो असुल उपरको सजाय माग गर्दै आरोपपत्र दायर गरेको हो।