बालेन शाह र रवि लामिछाने आउने भएपछि जनकपुरमा बढ्यो युवाको उत्साह

न्यूज ब्यूरो, जनकपुरधाम । काठमाडौं महानगरपालिकाका मेयर बालेन्द्र शाह (बालेन) र राष्ट्रिय स्वतन्त्र पार्टीका सभापति रवि लामिछाने जनकपुरधाम आउन थालेसँगै यहाँको राजनीतिक वातावरणमा उल्लेखनीय उत्साह देखिन थालेको छ । विशेषतः युवा वर्ग, सामाजिक अभियन्ता र राजनीतिक चासो राख्ने समुदायबीच उनीहरूको उपस्थितिलाई परिवर्तनको संकेतका रूपमा हेरिएको छ ।

पछिल्ला दिनहरूमा जनकपुरधाममा आयोजना भएका कार्यक्रम, भेटघाट र सार्वजनिक गतिविधिमा बालेन शाह र रवि लामिछानेको नाम जोडिँदै जाँदा सामाजिक सञ्जालदेखि चोक–चौतारोसम्म राजनीतिक बहस तातेको छ । उनीहरूलाई प्रत्यक्ष हेर्न, सुन्न र भेट्न युवाहरूको उत्सुकता उल्लेखनीय देखिएको छ ।

स्थापित राजनीतिक दल र परम्परागत नेताप्रति निराश हुँदै आएको जनकपुरको युवा पुस्ता बालेन शाह र रवि लामिछानेको उपस्थितिलाई नयाँ सम्भावनाका रूपमा बुझिरहेको देखिन्छ । भ्रष्टाचारविरुद्धको कठोर अभिव्यक्ति, व्यवस्थापन र सुशासनका मुद्दामा स्पष्ट धारणा, तथा सामाजिक सञ्जालमार्फत सिधा संवाद गर्ने शैलीले उनीहरू युवामाझ लोकप्रिय बनेका छन् ।

जनकपुरधामका एक युवा अभियन्ता भन्छन्, “हामीले सामाजिक सञ्जालमा मात्रै देखेका पात्रहरू यहाँ आएपछि राजनीतिको स्वाद फरक महसुस हुनेछ छ । अब राजनीति पनि हाम्रो जस्तो युवाको कुरा सुन्छ भन्ने आशा पलाएको छ ।”

मधेश प्रदेशको सांस्कृतिक र राजनीतिक केन्द्र मानिने जनकपुरधाममा लामो समयदेखि परम्परागत दलहरूको दबदबा रहँदै आएको छ । यद्यपि पछिल्ला चुनावी परिणाम र बढ्दो राजनीतिक सचेतनाले यहाँ पनि वैकल्पिक राजनीतिक धारप्रति आकर्षण बढ्दै गएको संकेत देखिन्छ ।

बालेन शाहको कार्यशैली र रवि लामिछानेको राष्ट्रिय राजनीतिमा उदयले जनकपुरको राजनीतिक विमर्शलाई पनि प्रभावित गरेको विश्लेषकहरू बताउँछन् । उनीहरूको आगमनलाई कतिपयले आगामी चुनावी समीकरणसँग जोडेर हेर्न थालेका छन् भने कतिपयले यसलाई जनचेतना र दबाब सिर्जना गर्ने सकारात्मक पहलका रूपमा लिएका छन् ।

बालेन शाह र रवि लामिछाने जनकपुरधाममा देखिएसँगै सामाजिक सञ्जालमा फोटो, भिडियो र प्रतिक्रियाहरू तीव्र गतिमा फैलिएका छन् । टिकटक, फेसबुक र युट्युबमा उनीहरूको उपस्थितिसँग जोडिएका सामग्री भाइरल भइरहेका छन् । यसले भौतिक उपस्थितिसँगै डिजिटल प्रभाव पनि थप बलियो बनाएको छ ।

तर राजनीतिक विश्लेषकहरू भने सामाजिक सञ्जालको उत्साहलाई मात्रै पर्याप्त नठान्न सुझाव दिन्छन् । उनीहरूका अनुसार वास्तविक प्रभाव आगामी दिनमा हुने राजनीतिक गतिविधि, संगठन विस्तार र जनस्तरसँगको निरन्तर सम्पर्कले निर्धारण गर्नेछ ।

अहिले जनकपुरको चोकचोक, पोलहरुमा रवि–बालेनसहितको प्रचार पोष्टर, पम्पलेटहरु टाँस्न, झुण्डयाउन सुरु गरिएको छ । बालेन र रवि भोली जनकपुर आउने कार्यक्रम तय भएको छ । भोली मधेश प्रदेश सरकारले बलिदानी दिवस मनाउने कार्यक्रम रहेको छ ।