आठ दशकमा तेस्रो पटक फुट्यो नेपाली काँग्रेस, सभापतिमा एक्लै 'गगन'

न्यूज ब्यूरो, काठमान्डौँ । नेतृत्व परिवर्तन र पार्टी रुपान्तरणको मागलाई संस्थापन पक्षले बेवास्ता गरेपछि नेपाली कांग्रेस औपचारिक रूपमा विभाजनको चरणमा पुगेको छ।

पार्टी सभापति शेरबहादुर देउवाको नेतृत्वमा अघि बढ्न नसकिने निष्कर्षसहित विशेष महाधिवेशनको माग गर्दै आएको गगन थापा–विश्वप्रकाश शर्मा समूह र संस्थापन पक्षबीचको टकराव अन्ततः पार्टी फुटको अवस्थामा पुगेको हो।

देउवा नेतृत्वको कांग्रेस केन्द्रीय कार्यसमितिले अनुशासन उल्लंघनको अभियोग लगाउँदै महामन्त्री गगन थापा, महामन्त्री विश्वप्रकाश शर्मा र सहमहामन्त्री फर्मुल्लाह मन्सुरलाई पाँच वर्षका लागि निष्कासन गर्ने निर्णय गरेको छ। पार्टीको यो निर्णयपछि असन्तुष्ट पक्षले त्यसलाई अवैध र अलोकतान्त्रिक भन्दै अस्वीकार गरेको छ।

कारबाहीपछि प्रतिक्रिया दिँदै गगन थापाले नेपाली कांग्रेस कसैको निजी कम्पनी नभएको उल्लेख गरे। “यो पार्टी मैले र मेरा अग्रजहरूले आन्दोलन गरेर बनाएको हो, इतिहास बोकेको संस्था हो,” थापाको भनाइ छ।

कारबाहीकै बीच विशेष महाधिवेशन पक्षधरहरूले महाधिवेशनको प्रक्रिया अघि बढाएका छन्। महाधिवेशन प्रतिनिधिहरूको बहुमत आफ्नो पक्षमा रहेको दाबी गर्दै विशेष महाधिवेशनले नयाँ नेतृत्व चयनको प्रक्रिया सुरु गरेको छ। यस क्रममा गगन थापाले सभापति पदका लागि उम्मेदवारी दर्ता गराएका छन् र उनी एकल उम्मेदवार रहेको बताइएको छ।

असन्तुष्ट पक्षका अनुसार पार्टी विधानअनुसार ५४ प्रतिशतभन्दा बढी महाधिवेशन प्रतिनिधिको माग आएपछि विशेष महाधिवेशन अनिवार्य हुन्छ। उनीहरूले पुस २८ भित्र महाधिवेशन बोलाउन दिएको निवेदनको समयसीमा सकिन लागेकाले जसरी पनि महाधिवेशन गरेरै छाड्ने अडान लिएका थिए।

देउवा पक्षले भने पार्टी चुनावको तयारीमा रहेकाले तत्काल विशेष महाधिवेशन सम्भव नभएको दाबी गर्दै आएको थियो। केन्द्रीय कार्यसमितिले नियमित महाधिवेशनका लागि वैशाख अन्तिम साता मिति तय गरिसकेको भन्दै विशेष महाधिवेशनको माग अस्वीकार गरिएको थियो।

संस्थापन पक्षको तर्क छ, पार्टीलाई निर्वाचनमा होमिनुपर्ने अवस्थामा आन्तरिक विवाद चर्काउनु गलत हुनेछ। तर यही अडानले पार्टीभित्रको असन्तुष्टि झन् चर्किँदै गएको देखिन्छ।

पार्टी विभाजन रोक्न अन्तिम समयसम्म दुवै पक्षबाट वार्ताका प्रयास भए। दुवै समूहले वार्ता टोली गठन गरी सन्देश आदान–प्रदान गरे पनि नेतृत्व हस्तान्तरण र विशेष महाधिवेशनको मुद्दामा सहमति जुट्न सकेन। अन्ततः अडान नछोड्दा कांग्रेस विभाजनको अवस्थामा पुगेको हो।

पार्टीको आधिकारिकता कसले पाउने भन्ने विषय अब निर्वाचन आयोग र अदालतसम्म पुग्ने संकेत देखिएको छ। दुवै पक्षले आफू नै वास्तविक नेपाली कांग्रेस भएको दाबी गरेका छन्। यसले आसन्न आमनिर्वाचनअघि कांग्रेसको संगठन, उम्मेदवार चयन र मतदाता आधारमा गम्भीर प्रभाव पार्ने राजनीतिक विश्लेषकहरूको अनुमान छ।

विशेष महाधिवेशनमा थापाले एक्लै सभापतिमा उम्मेदवारी दिएपछि उनी निर्विरोध सभापति बन्ने लगभग पक्कापक्की छ । विशेष महाधिवेशनले मान्यता पाए लगत्तै उनी सभापति बन्नेछ ।