साना किसान दिगम्बपुरको २३औँ साधारणसभाबाट किसान केन्द्रीत सात प्रस्ताव पारित

न्यूज ब्यूरो, जनकपुरधाम । साना किसान कृषि सहकारी संस्था लि., दिगम्बरपुर, धनुषाको २३औँ वार्षिक साधारण सभा विभिन्न किसान–केन्द्रित प्रस्ताव पारित गर्दै सफलतापूर्वक सम्पन्न भएको छ।

संस्थाका अध्यक्ष लक्ष्मी यादवको अध्यक्षतामा सम्पन्न साधारण सभामा प्रमुख अतिथिका रूपमा क्षिरेश्वरनाथ नगरपालिकाका नगर प्रमुख सुखदेव यादव सहभागी हुनुहुन्थ्यो। प्रमुख अतिथि यादवले किसानहरूको हितलाई मध्यनजर गर्दै मल–खादका लागि डिलर व्यवस्था, गार्मेन्ट सञ्चालनका लागि भवन निर्माण तथा सिलाइ मेसिन उपलब्ध गराउने प्रतिबद्धता व्यक्त गर्नुभयो।

साधारण सभामा विशिष्ट अतिथिका रूपमा क्षिरेश्वरनाथ नगरपालिकाकी उप–प्रमुख रचना श्रेष्ठ, वन डिभिजन कार्यालय धनुषाका प्रमुख विनोद सिंह, राष्ट्रिय सहकारी महासंघका सञ्चालक नथुनी यादव, मिथिला लघुवित्तका प्रमुख कार्यकारी अधिकृत सत्यदेव राउत सहभागी हुनुहुन्थ्यो। यस्तै, धनुषाधाम नगरपालिका वडा नं. ६ का वडा अध्यक्ष ऋषिकेश लामा, क्षिरेश्वरनाथ नगरपालिका वडा नं. ८ का वडा अध्यक्ष मोदकुमार महतो, वडा नं. ९ का वडा अध्यक्ष अवध किशोर यादव, विभिन्न संघ–संस्थाका प्रतिनिधि, कार्यक्रम सञ्चालक तथा उद्घोषक एवम् संस्थाका उपाध्यक्ष रामपुकार यादव लगायत सम्पूर्ण सेयर सदस्यहरूको उल्लेखनीय उपस्थिति रहेको थियो।

संस्थाका प्रबन्धक चन्द्र किशोर महतोले आर्थिक वर्ष २०८१/०८२ को बजेट तथा प्रगति प्रतिवेदन प्रस्तुत गर्दै हाल संस्थामा ४५६ महिला समूह र ८६ पुरुष समूह गरी जम्मा ५५० समूह आबद्ध रहेको जानकारी दिनुभयो। संस्थामा कुल सेयर सदस्य संख्या २ हजार ४६३ रहेको छ। सेयर पुँजी रु. ३ करोड १९ लाख ८२ हजार, निक्षेप रकम रु. १५ करोड ७४ लाख ३० हजार र जगेडा कोषमा रु. ४ करोड ३७ लाख ४७ हजार संचित रहेको प्रतिवेदनमा उल्लेख छ।

प्रतिवेदन अनुसार किसानहरूमा लगानी गरिएको कुल रकम रु. ३१ करोड ३३ लाख रहेको छ भने संस्थाको कुल आम्दानी रु. ५ करोड १ लाख ४९ हजार पुगेको छ। सबै खर्च कटौतीपछि चालु आर्थिक वर्षमा संस्थाले रु. १ करोड ४ लाख १७ हजार खुद नाफा आर्जन गर्न सफल भएको छ। हाल संस्थाको आफ्नै पुँजी करिब रु. २८ करोड पुगेको बताइएको छ।

साधारण सभाले किसानहरूको सहजताका लागि विभिन्न महत्वपूर्ण प्रस्तावहरू पारित गरेको छ। भाका नाघेका ऋणीहरूका लागि पहिले कायम रहेको २१ प्रतिशत ब्याजदर घटाएर १६ प्रतिशत कायम गर्ने निर्णय गरिएको छ। यस्तै, नियमित ऋणतर्फको ब्याजदर १३.७५ प्रतिशतबाट घटाएर १२.५ प्रतिशत, ९ प्रतिशत र ७ प्रतिशतसम्म कायम गरिनेछ, जुन आगामी फागुन १ गतेदेखि लागू हुने संस्थाले जनाएको छ।

यस अवसरमा संस्थाले सामाजिक उत्तरदायित्वअन्तर्गत विभिन्न विद्यालयका छात्र–छात्रालाई झोला, कापी, कलम लगायत शैक्षिक सामग्री वितरण गरी सम्मानसमेत गरेको छ। साधारण सभाले सहकारीमार्फत किसानको आर्थिक सशक्तीकरण र स्थानीय विकासमा योगदान पुर्‍याउने प्रतिबद्धता पुनः दोहोर्‍याएको छ।