सर्लाहीमा एक चौकीदारको विभत्स हत्या, टाउको काटेर फालिएको अवस्थामा फेला

न्यूज ब्यूरो, सर्लाही । सर्लाहीको सागरनाथ वन विकास परियोजनामा कार्यरत एक वन चौकीदारको विभत्स हत्या भएको घटना सार्वजनिक भएको छ।

ईश्वरपुर नगरपालिका–२ राइटरखोरस्थित सागरनाथ वन विकास परियोजनामा ज्यालादारीमा वन हेरालुको काम गर्दै आएका स्थानीय ४७ वर्षीय रामईश्वर महतोको टाउको काटिएको अवस्थामा शव फेला परेको हो। महतोको टाउको भने अझै फेला नपरेको सर्लाही प्रहरीका प्रवक्ता तथा प्रहरी नायब उपरीक्षक सरोज राईले जानकारी दिए।

उनका अनुसार मृतकको टाउको खोजीका लागि प्रहरी अनुसन्धान तीव्र बनाइएको छ। महतोको शव घरबाट करिब पाँच सय मिटर टाढा जंगलभित्र फेला परेको स्थानीयले बताएका छन्।

शनिबार बिहान जंगलमा रुख काटिएको आवाज सुनेर त्यसतर्फ गएका महतो दिउँसोसम्म घर नफर्किएपछि परिवार र स्थानीयले खोजी गर्दा टाउकोबिनाको शव भेटिएको थियो। घटनास्थलबाट एक थान बञ्चरोसमेत बरामद गरिएको प्रहरीले जनाएको छ।

घटनाको प्रकृति गम्भीर रहेकाले सूक्ष्म र गहिरो अनुसन्धान थालिएको प्रहरीले जनाएको छ। प्रदेश प्रहरी प्रमुख डिआइजी गोविन्द थपलियाका अनुसार घटनाको सत्यतथ्य पत्ता लगाउन विशेष तालिम प्राप्त प्रहरी टोली र तालिम प्राप्त कुकुरसमेत घटनास्थलमा परिचालन गरिएको छ।

सर्लाही प्रहरीले एक जना शंकास्पद व्यक्तिलाई नियन्त्रणमा लिएर अनुसन्धान अघि बढाएको जनाएको छ। घटनापछि स्थानीयवासी त्रसित बनेका छन् भने सुरक्षा व्यवस्था कडा पारिएको प्रहरीले जनाएको छ।