कमला नगरपालिकामा नगरसभा गराउन तथा तलबभत्ता दिन वडासदस्यहरुको माग

न्यूज ब्यूरो, जनकपुरधाम । धनुषाको कमला नगरपालिकामा दोस्रो चौमासिक सुरु भएपनि अहिलेसम्म नगरसभा हुन नसक्दा जनप्रतिनीधिहरु समेत वाक्क हुन थालेका छन् ।

२०८२/०८३ को लागि अझै कमला नगरपालिकाले बजेट ल्याउन नसकेपछि विभिन्न वडाका वडासदस्यहरु समेत अप्रत्यक्ष रुपमा आन्दोलित भएका छन् ।

नगरपालिकाका मेयर उपमेयर र वडाध्यक्षहरुमा भाँडभैलो भएपछि वडासदस्यहरुले अप्रत्यक्ष रुपमा आन्दोलन थालेका छन् । सोही क्रममा विभिन्न वडाका वडासदस्यहरुले नगर प्रमुख विशेश्वर यादवलाई यथाशिघ्र नगरसभा बोलाउन माग गरेका छन् ।

वडा नं. २ का वडासदस्य जीतनारायण यादवको अगुवाईमा १ देखि ९ नम्बर वडाका वडासदस्यहरुले नगर प्रमुख यादवलाई यो महिनाभित्रै नगरसभा गरी कर्मचारीहरुको तलबभत्ता, विकास निर्माणका कार्यहरु गराउन माग गरेका छन् ।

कार्यपालिकाको बैठक पटक पटक बसेपनि नगरसभाको लागि अझै सहमति जुटन सकेको छैनन् ।