धनुषाः सरकारी जग्गामा जबरदस्ती घर निर्माण, पोखरी पुरेर घर बनाएको आरोप

न्यूज ब्यूरो, जनकपुरधाम । धनुषामा एक सरकारी जग्गामा एक व्यक्तिले नीजि आवास निर्माण गरेको भन्दै स्थानीयहरुले विरोध जनाएका छन् ।

नेपाल सरकारको नाममा भएको जग्गा व्यक्तिले अतिक्रमण गरेको पाइएको छ । धनुषाको हंसपुर नगरपालिका वडा नं. ७ नौवाखोरमा नेपाल सरकारको नाममा रहेको जग्गा व्यक्तिले घर निर्माण गरी अतिक्रमण गरी घर बनाएको भन्दै विरोध चुलिएको छ ।

मालपोत कार्यालय धनुषाको श्रेस्तामा रहेको कित्ता नम्बर १५२ मा पोखरी रहेको छ । पोखरीलाई पुरेर घर बनाउन लागेको स्थानीयहरुको आरोप छ ।

हंसपुर नगरपालिका वडा नं. ७ को मिति २०८२/०८/२८ को चलानी नं. ४१४ सिफारिसमा किता नं. १५१ को क्षेत्रफल ०-७-१७-० र १५२ को क्षेत्रफल ०-७-०-० को जग्गा नेपाल सरकारको नाउ रहेको उल्लेख गरिएको छ ।

उच्च अदालत जनकपुर वाट २०८२ पौष ०४ गते आदेशानुसार किता नं. १५१ र १५२ निवेदनको अन्तिम टुंगो नलागेसम्म प्रचलित कानुनको प्रक्रिया पुरा नगरी उक्त किताको सार्वजानिक जग्गा पर्ने गरी घर निर्माण गर्ने समेत कार्य नगर्नु नगराउनु आदेश जारी गरेको छ ।

अहिले आदालतको आदेश भए पनि घर निर्माण कार्य रोकिएको छैन ।

यता, वडाध्यक्ष हैदर अलिले समेत सार्वजनिक जग्गामा स्थानीय महेश दासले घर बनाइरहेको पुष्टि गरे । उनले सो जग्गा सरकारी रहेको र आवास निर्माण भईरहेको बताए ।

घरधनी दासले भने आफूहरु बर्षौदेखि सो जग्गा भोगचलन गरेको बताए । भोगचलन अनुसार आफूले घर निर्माण गरेको बताए । उनले नापीमा सरकारी स्वामित्व रहेको स्वीकार गर्दै भोगचलन अनुसार आफूले बनाएको बताए ।