यादव-ठाकुरबीच पार्टीगत एकता गर्ने सहमति, आज पार्टी एकता हुँदै

न्यूज ब्यूरो, जनकपुरधाम । उपेन्द्र यादव नेतृत्वको जनता समाजवादी पार्टी (जसपा) नेपाल र महन्थ ठाकुर नेतृत्वको लोकतान्त्रिक समाजवादी पार्टी (लोसपा) नेपालबीच एकता गर्ने सहमति भएको छ। आइतबार राति काठमाडौँमा भएको सहमतिपत्रमा दुवै पार्टीका अध्यक्ष यादव र ठाकुरले संयुक्त हस्ताक्षर गरेका छन्।

जसपा नेपालबाट अलग भएर ठाकुरले लोसपा गठन गरेका थिए। देशको वर्तमान राजनीतिक परिस्थितिको मूल्यांकन गर्दै संघीय लोकतान्त्रिक गणतन्त्र, संघीयता, पहिचान, समानुपातिक समावेशिता र सामाजिक न्यायलाई मजबुत बनाउने उद्देश्यसहित एकीकरणको निर्णय गरिएको सहमतिपत्रमा उल्लेख छ।

सहमति अनुसार एकीकृत पार्टीको नाम जनता समाजवादी पार्टी नेपाल नै रहनेछ। उपेन्द्र यादव कार्यकारी अधिकारसहित अध्यक्ष रहनेछन् भने महन्थ ठाकुर सम्मानित नेता रहने स्रोतले जनाएको छ। सोमबार पार्टीको औपचारिक घोषणा तथा केन्द्रीय समिति गठन हुने सम्भावना छ।

एकीकरणपछि मधेश प्रदेशको राजनीतिमा ठूलो फेरबदल आउने देखिएको छ। जसपा–लोसपा एकीकरणपछि मधेश प्रदेशमा नेकपा एमालेभन्दा ठूलो दल बन्ने सम्भावना बढेको राजनीतिक विश्लेषकहरूको भनाइ छ। आगामी प्रतिनिधिसभा निर्वाचनलाई लक्षित गर्दै दलहरू एकता र सहकार्यतर्फ उन्मुख भएको पनि उनीहरूको टिप्पणी छ।