मुख्यमन्त्री यादवलाई एमालेको पनि विश्वासको मत, सर्वसम्मतले मुख्यमन्त्रीमा निरन्तरता

न्यूज ब्यूरो, जनकपुरधाम । मधेश प्रदेशका मुख्यमन्त्री कृष्णप्रसाद यादवले प्रदेश सभाबाट विश्वासको मत प्राप्त गरेका छन्। शुक्रबार दिउँसो ४ बजेका लागि आह्वान गरिएको प्रदेशसभा बैठक करिब डेढ घण्टा ढिलो गरी सुरु भए पनि बैठकबाट सर्वसम्मत रूपमा मुख्यमन्त्री यादवले विश्वासको मत पाएका हुन्।

कांग्रेस संसदीय दलका नेता समेत रहेका मुख्यमन्त्री यादव मंसिर १९ गते नेकपा एमालेबाहेकको सात दलीय गठबन्धनका ७७ सांसदको समर्थनमा मुख्यमन्त्री नियुक्त भएका थिए। शुक्रबारको बैठकमा गठबन्धनमा सहभागी नभएको एमालेले पनि मुख्यमन्त्री यादवलाई विश्वासको मत दिएको छ।

मुख्यमन्त्री यादव यसअघि एमालेबाट मुख्यमन्त्री नियुक्त भएका सरोजकुमार यादवको सरकार ढालेर सत्तामा आएका हुन्। ठूलो दलको हैसियतमा कार्तिक २४ गते रातारात मधेशको मुख्यमन्त्री नियुक्त भएका सरोजकुमार यादव २४ दिनमै पदमुक्त भएका थिए, जससँगै एमाले मधेश प्रदेशमा प्रतिपक्षको भूमिकामा पुगेको थियो। उक्त घटनाक्रममा एमालेले मुख्यमन्त्रीसँगै प्रदेश प्रमुख र सभामुखको पदसमेत गुमाएको थियो।

सबै दलले कांग्रेसलाई समर्थन गर्दै एमालेबाट साथ फिर्ता लिएपछि कांग्रेस संसदीय दलका नेता कृष्णप्रसाद यादवको नेतृत्वमा नयाँ प्रदेश सरकार गठन भएको हो। सरोजकुमार यादवसँगै तत्कालीन प्रदेश प्रमुख सुमित्रा सुवेदी भण्डारी र सभामुख रामचन्द्र मण्डल पनि पदमुक्त भएका थिए।

शुक्रबारको प्रदेशसभा बैठकमा कुल १०४ सदस्य मध्ये उपस्थित सांसदहरूमध्ये ९२ जनाले मुख्यमन्त्री यादवको पक्षमा मतदान गरेका छन्। यादवलाई कांग्रेस, जसपा नेपाल, जनमत पार्टी, नेकपा माओवादी केन्द्र, नेकपा एकीकृत समाजवादी, लोसपा नेपाल र नागरिक उन्मुक्ति पार्टीको समर्थन रहेको छ।

प्रदेशसभामा सात दलीय गठबन्धनअन्तर्गत कांग्रेसका २२, जसपा नेपालका १९, जनमत पार्टीका १३, माओवादी केन्द्रका ९, लोसपा नेपालका ८, नेकपा एकीकृत समाजवादीका ७ र नागरिक उन्मुक्ति पार्टीका १ गरी कुल ७८ सांसद रहेका छन्। प्रतिपक्षी दलका रूपमा नेकपा एमालेका २४ तथा राप्रपा र संघीय समाजवादी पार्टीका १/१ जना सांसद छन्।

यता एमालेले मुख्यमन्त्री यादवलाई विश्वासको मत दिएपछि आगामी राष्ट्रियसभा निर्वाचनमा कांग्रेसले एमालेको समर्थन गर्न सक्ने सम्भावना बढेको भन्दै कांग्रेस–एमाले इतरका दलहरूमा संशय उत्पन्न भएको छ।