साँसद कञ्चन बिच्छालाई बन्द सूचिबाट हटाउने निर्णय

न्युज ब्यूरो, जनकपुरधाम । राष्ट्रिय प्रजातन्त्र पार्टी (राप्रपा) ले मधेश प्रदेशसभा सदस्य कञ्चन विच्छालाई समानुपातिकतर्फको बन्द सूचीबाट हटाउने निर्णय गरेको छ ।

शुक्रबार काठमाडौँमा सम्पन्न केन्द्रीय कार्यसमितिको बैठकले विच्छालाई सूचीबाट हटाउने निर्णय गरेको राप्रपाका प्रवक्ता मोहनकुमार श्रेष्ठले जानकारी दिए । बैठकले यसअघि केन्द्रीय कार्य सम्पादन समितिले गरेको निर्णयलाई अनुमोदन गर्दै विच्छालाई ६ महिनाका लागि पार्टीको साधारण सदस्यबाट निष्कासन गर्ने निर्णय पनि गरेको छ ।

पार्टीद्वारा जारी निर्णयमा भनिएको छ, ‘पार्टीको निर्देशन विपरीत सरकारमा सहभागी भएकी मधेश प्रदेशकी महिला समानुपातिक सांसद कञ्चन विच्छालाई ६ महिनाका लागि साधारण सदस्यबाट निष्कासन गर्ने तथा निजलाई मधेश प्रदेशको महिला समानुपातिकतर्फको बन्द सूचीबाट हटाउने निर्णय गरिएको छ ।’

विच्छा नेकपा (एमाले) नेतृत्वमा गठन भएको मधेश प्रदेश सरकारमा सहभागी भएपछि राप्रपाले उनलाई सांसद पदबाट हटाउने निर्णय गरेको थियो । सो निर्णयविरुद्ध उनी सर्वोच्च अदालत पुगेकी थिइन् । सर्वोच्च अदालतले मंसिर २३ गते उनलाई सांसद पदबाट नहटाउन अन्तरिम आदेश जारी गरेको थियो ।