मन्त्रीमण्डल विस्तार र विश्वासको मत लिन सत्तारुढ दलको बैठक बस्दै

न्यूज ब्यूरो, जनकपुरधाम । जनकपुरधाम । मधेश प्रदेशको सत्तारुढ सात दलीय गठबन्धनको बैठक शुक्रबार बस्ने भएको छ ।

मन्त्रिमण्डल विस्तारदेखि मुख्यमन्त्रीले विश्वासको मत लिने मितिसम्मका विषयमा छलफल गर्न मधेश भवनमा बैठक बोलाइएको हो ।

मुख्यमन्त्री कृष्णप्रसाद यादव नेतृत्वको सरकार गठन भएको एक साता बितिसके पनि मन्त्रिपरिषद् विस्तार र विश्वासको मत लिने समय टुंगो लाग्न नसकेकाले गठबन्धन बैठकमा यी विषयमा विस्तृत छलफल हुने जनाइएको छ ।

जनता समाजवादी पार्टी (जसपा) नेपाल मधेश प्रदेशका प्रमुख सचेतक राम अशिष यादवले बैठकमा मुख्यमन्त्रीले विश्वासको मत लिने समयबारे मुख्य छलफल हुने बताए ।

उनका अनुसार बैठकबाट मन्त्रिमण्डल विस्तार, मन्त्रालयको भागबण्डा र विश्वासको मत लिने मिति लगायतका विषयमा अन्तिम निर्णय हुने अपेक्षा गरिएको छ ।

सत्तारुढ गठबन्धनमा नेपाली कांग्रेस, जसपा नेपाल, जनमत पार्टी, नेकपा (माओवादी केन्द्र), नेकपा (एकीकृत समाजवादी), लोकतान्त्रिक समाजवादी पार्टी (लोसपा) नेपाल र एक सिट भएको नागरिक उन्मुक्ति पार्टी समावेश छन् ।