संविधान पुर्नलेखनसहित ११ बुँदे माग राख्दै जसपा नेपालको आन्दोलन सुरु

न्यूज ब्यूरो, जनकपुरधाम । जनता समाजवादी पार्टी (जसपा), नेपाल धनुषाले पार्टीको पूर्वनिर्धारित आन्दोलन कार्यक्रमअनुसार आज जिल्ला प्रशासन कार्यालय धनुषा अगाडि शान्तिपूर्ण धर्ना प्रदर्शन गरेको छ। धर्ना मार्फत जसपाले देशको विद्यमान राजनीतिक, आर्थिक तथा प्रशासनिक अवस्थाप्रति गम्भीर चिन्ता व्यक्त गर्दै सरकारसमक्ष तत्काल ध्यानाकर्षण गराइएको छ।

धर्नामा पार्टीले लामो समयदेखि उठाउँदै आएको २८ बुँदे मागलाई पुनः सशक्त रूपमा प्रस्तुत गरिएको थियो। जसपाले संविधान संशोधन तथा पुनर्लेखनमार्फत राज्य पुनर्संरचना स्पष्ट र न्यायसंगत बनाउनुपर्ने, निर्वाचन क्षेत्र जनसंख्याको आधारमा पुनः निर्धारण गर्नुपर्ने र स्थानीय तहलाई प्रादेशिक अधिकारक्षेत्रभित्र प्रभावकारी रूपले सञ्चालन गर्नुपर्ने माग अघि सारेको छ। यससँगै जनता स्वयंले प्रत्यक्ष रूपमा निर्वाचित गर्ने कार्यकारी राष्ट्रपतिको व्यवस्था आवश्यक रहेको पार्टीले जोड दिएको छ।

कृषि क्षेत्रमा किसानलाई सहुलियतपूर्ण ऋण उपलब्ध गराउने, उखु किसानको भ्याटसम्बन्धी बाँकी ३५ प्रतिशत रकम तुरुन्तै भुक्तानी गर्ने तथा पर्याप्त मल–खादको आपूर्ति सुनिश्चित गर्नुपर्ने माग पनि धर्नामा प्रमुख रूपमा उठाइयो। प्रदेश सरकारलाई अधिकार सम्पन्न बनाउन प्रहरी र कर्मचारी समायोजन प्रक्रिया त्वरित लागू गर्नुपर्ने कुरा जसपाले पुनः दोहोर्‍याएको छ। साथै, नेपाल सरकारले गर्ने राजनीतिक नियुक्तिहरूमा चल्दै आएको भागबन्डा प्रणाली अन्त्य गर्नुपर्ने चेतावनीसहित समावेशी र पारदर्शी व्यवस्थाको माग गरिएको छ।

युवाओंका हकहितका विषयमा समेत जसपा स्पष्ट रूपमा उभिएको छ। जेनजी युवाहरूले उठाएका जायज माग र अवसरहरूको सुनिश्चितताका लागि राज्यले ठोस नीतिगत कदम लिनुपर्ने पार्टीको धारणा रहेको धर्नामा बताइएको छ। त्यस्तै, चुरिया क्षेत्रमा भइरहेको अनाधिकृत गिट्टी–बालुवा उत्खनन, वन विनाश तथा पर्यावरणीय क्षतिको तत्काल अन्त्य गरी चुरे क्षेत्रको संरक्षणलाई सरकारी प्राथमिकतामा राख्नुपर्ने माग समेत जसपाले प्रस्तुत गरेको छ।

पूर्वाधार विकासको पक्षमा पनि जसपा सक्रिय देखिएको छ। विशेष गरी हुलाकी सडकअन्तर्गत धनुषा–सिरहा जोड्ने कमला नदीको पुल पुनः निर्माण कार्य अविलम्ब सुरु गर्नुपर्ने र स्थानीय स्तरमा जनप्रतिनिधिहरूको प्रत्यक्ष सहभागिता सुनिश्चित गर्न निर्दलीय स्थानीय निर्वाचनको व्यवस्थापन आवश्यक रहेको भनिएको छ।

पार्टीले आफ्नो २८ बुँदे माग पूरा नभएसम्म आन्दोलनका कार्यक्रमहरू चरणबद्ध रूपमा जारी रहने चेतावनी जसपा नेपालका धनुषा जिल्ला अध्यक्ष पशुपति यादवले दिएका छन्।