काँग्रेसका कृष्णा यादवलाई मधेश प्रदेशको मुख्यमन्त्री बनाउने सहमति

न्यूज ब्यूरो, जनकपुरधाम । मधेश प्रदेशमा नयाँ सरकार निर्माणका लागि तयार भएको छ दलीय गठबन्धनले नेपाली कांग्रेसका नेता कृष्णा यादवलाई मुख्यमन्त्री बनाउने सहमति गरेको छ।

मुख्यमन्त्री पदका लागि लोकतान्‍त्रिक समाजवादी पार्टी (लोसपा) का जितेन्द्र सोनल समेत दाबेदार रहे पनि पछिल्लो राजनीतिक परिस्थितिलाई हेर्दा यादवको नाममै सहमति जुटेको गठबन्धन स्रोतले जनाएको छ।

गठबन्धनका एक नेताका अनुसार आजै केही बेरमा उनीहरू प्रदेश प्रमुखको कार्यालयमा आफ्नो दाबी पेश गर्न जाने तयारीमा छन्। प्रदेश प्रमुखलाई दाबी पेस गर्ने अन्तिम समय आज साँझ ५ बजेसम्म निर्धारण गरिएको छ।

यसैबीच, मन्त्रालयको बाँडफाँटबारे पनि छलफल अघि बढेको छ। केही मन्त्रालयको विषयमा सहमति भइसकेको र केहीबारे आज नै टुंगो लगाउने प्रयास भइरहेको गठबन्धन स्रोतले बतायो।

गठबन्धनले अहिलेका लागि कृष्णा यादवको नेतृत्वमा सरकार गठन गर्ने सहमतिसहित दाबी पेश गर्ने तयारी गरेको छ।