सप्तव्यापी विवाहपँचमी महोत्सव आजदेखि सुरु, यी ४ दिनसम्म माछामासु मदिरा विक्री वितरण बन्द

न्यूज ब्यूरो, जनकपुरधाम । प्राचीन मिथिलाको राजधानी जनकपुरधाममा हरेक वर्षझैँ यस वर्ष पनि भव्यतापूर्वक आयोजना हुने साताव्यापी सीताराम विवाहपञ्चमी महोत्सवको तयारी अन्तिम चरणमा पुगेको जनकपुरधामस्थित जानकी मन्दिर व्यवस्थापन समितिले जनाएको छ।

महोत्सव नजिकिँदै जाँदा जानकी मन्दिर परिसरलाई दुलहीझैँ सजाइएको छ। मन्दिरको सरसफाइ, पण्डाल तथा मञ्च निर्माण, झिलिमिली बत्तीहरू, सांस्कृतिक कार्यक्रमका संरचना र व्यवस्थापनका अन्य पक्षहरू धमाधम पूरा हुँदैछन्।

सार्वजनिक गरिएको कार्यक्रमअनुसार महोत्सव बिहीबार नगरदर्शनबाट सुरु हुनेछ।

यसपछि शुक्रबार फूलवारी लिला, शनिबार धनुषा यज्ञ, आइतबार तिलकोत्सव, सोमबार मटकोर, मंगलबार स्वयंबर तथा मुख्य विवाह समारोह, र बुधबार रामकलेवासहित महोत्सवको समापन हुनेछ।

स्थानीय तथा बाह्य प्रदेशका भक्तजनको भीड बढ्दै गएको जनकपुरधाममा भारतका विभिन्न सहर–सहरबाट समेत परम्परागत शैलीमा ठूलो संख्यामा तीर्थयात्री आउने क्रम जारी रहने छ।

मन्दिर व्यवस्थापनका अनुसार यस वर्षको महोत्सव पूर्वाधार, सुरक्षा र भीड व्यवस्थापनका दृष्टिले पछिल्ला वर्षभन्दा अझ व्यवस्थित र आकर्षक बन्ने विश्वास लिइएको छ।

विवाहपँचमीमा विभिन्न स्थानबाट श्रद्धालुहरु जनकपुर आउने भएपछि आउँदो आईतबारदेखि बुधबारसम्म जनकपुरभित्र माछामासु, मदिरा विक्री वितरणमा रोक लगाउने भएको छ ।

जिल्ला प्रशासन कार्यालय धनुषाले एक सूचना जारी गरी मँसिर ७ गतेदेखि मँसिर १० गतेसम्म जनकपुरधामभित्र माछामासु, मदिराजन्य वस्तुहरु विक्री वितरण नगर्न अनुरोध गरेको छ । निषेध गरिएको माछामासु विक्री वितरण गरिएमा कानुन बमोजिम कारवाही हुने प्रशासनले जनाएको छ ।