अशान्त बन्दै मधेशः एमालेको शक्ति प्रदर्शन, ७ दलको विरोध

न्यूज ब्यूरो, जनकपुरधाम । एमाले सँसदीय दलका नेता एवम् वर्तमान मुख्यमन्त्री सरोज कुमार यादव मुख्यमन्त्रीमा नियुक्त भएपछि ७ दलको विरोधले मधेश अशान्त बनेको छ ।

जनकपुर लगायत विभिन्न जिल्लामा दिनहुँ भईरहेको प्रदर्शन, रैलीले मधेश अशान्त हुन थालेको हो । जसपा नेपाल, लोसपा, माओवादी (केन्द्र), नेकपा एकिकृत, जनमत पार्टी, नेपाली काँग्रेस र नागरिक उन्मुक्ति पार्टी सम्मलित ७ दलको विभिन्न जिल्लामा विरोध कार्यक्रम राखिएको छ ।

एमालेका नेता यादवलाई संविधान मिचेर मुख्यमन्त्री बनाएको भन्दै ७४ बढी मधेश प्रदेशका साँसदहरु सर्वोच्चमा रिट समेत दायर गरेका छन् । ७ दलका नेता कार्यकर्ताहरुले निरन्तर आन्दोलन जारी राखेका छन् । धनुषा, महोत्तरी, सर्लाही, रौतहट, बारा, पर्सा, सप्तरी लगायतका जिल्लाहरुमा ७ दल मिलेर आन्दोलन थालेका हुन् ।

यता, नव नियुक्त मुख्यमन्त्री यादवले आज जनकपुरमा शक्ति प्रदर्शनका गरेका छन् । एमालेका नेता कार्यकर्ताहरुले हजार बढीको सँख्यामा मोटरसाईकल रैली निकालेर शक्ति प्रदर्शन गरेका हुन् । उनका समर्थकहरु भेष्टमा उनको तस्विर नै लगाएर स्वागत गर्न एयरपोर्ट पुगेका थिए ।