मधेश प्रदेश सभामुख मण्डलविरुद्ध महाअभियोगको तयारी, ७४ भन्दा बढी सांसदको हस्ताक्षर

न्यूज ब्यूरो,जनकपुरधाम । मधेश प्रदेशका प्रदेश प्रमुखलाई आचरण विपरीत कार्य गरेको आरोपमा बर्खास्त गरेसँगै प्रदेश सभाका सभामुख रामचन्द्र मण्डलविरुद्ध पनि महाअभियोगको तयारी तीव्र बनेको छ। नेकपा (एमाले)बाट सभामुख बनेका मण्डलले मुख्यमन्त्री जितेन्द्रप्रसाद सोनलले विश्वासको मत लिने क्रममा पदीय आचरण विपरीत व्यवहार गरेको आरोप विपक्षी दलहरूले लगाएका छन्।

मुख्यमन्त्री सोनलले विश्वासको मत लिने उद्देश्यले बोलाएको प्रदेश सभा बैठकमा सभामुख मण्डलले उनलाई सम्बोधन गर्न नदिई मत विभाजनको प्रक्रिया अघि बढाएपछि सत्ता गठबन्धनका सांसदहरू आक्रोशित बनेका थिए। विपक्षी दलहरूको आरोप छ—सभामुख मण्डलले एमालेको कार्यकर्ताजस्तो व्यवहार गर्दै पदीय मर्यादा तोडेका छन्।

नेपाली कांग्रेसका एक सांसदका अनुसार सभामुख मण्डलविरुद्ध महाअभियोग दर्ताका लागि आवश्यकभन्दा बढी सांसदको हस्ताक्षर संकलन भइसकेको छ। विपक्षी दलहरूको दाबी अनुसार हालसम्म ७४ जना भन्दा बढी सांसदहरूले हस्ताक्षर गरेका छन्।

सभामुख मण्डलको भूमिकाप्रति पटक–पटक प्रश्न उठ्दै आएको छ। हालै लोसपाका सांसद उपेन्द्र महतोले सदनमै मण्डलको कार्यशैलीको विरोध गर्दै अपशब्द प्रयोग गरेका थिए भने यसअघि नेपाली कांग्रेसका सांसद शेषनारायण यादवसँग उनको वादविवाद समेत भएको थियो।

प्रत्येक आर्थिक वर्षको बजेट प्रक्रियामा पनि सभामुख मण्डल विवादमा आउने गरेका छन्। करारमा आफ्ना नातेदार तथा परिवारका सदस्यहरूलाई नियुक्ति गरी तलब र सुविधा लिएको आरोप समेत उनको माथि लाग्दै आएको छ।

सातदलीय गठबन्धनले सभामुखलाई पदमुक्त गर्ने प्रक्रिया आगामी सोमबारदेखि सुरु गर्ने तयारी गरेको उच्च स्रोतले जनाएको छ। आइतबार सर्वोच्च अदालतमा मुख्यमन्त्रीविरुद्धको मुद्दाको पेशी रहेकाले सोमबार सभामुखविरुद्ध महाअभियोग दर्ता गरिने बताइएको छ।

सभामुख मण्डलले भने आफू कसैको दबाबमा राजीनामा नदिने र महाअभियोगको सामना गर्न तयार रहेको प्रतिक्रिया दिएका छन्। मधेश प्रदेशका दोस्रो सभामुखका रूपमा निर्वाचित मण्डल पद सम्हालेदेखि नै विवादमा पर्ने गरेका छन्।