कमला नगरपालिकामा नेपाल निजामति कर्मचारी युनियनको स्थापना दिवस

न्यूज ब्यूरो, जनकपुरधाम । नेपाल निजामति कर्मचारी युनियनको स्थापना दिवस कमला नगरपालिकामा विभिन्न कार्यक्रमसहित मनाइएको छ। स्थापना दिवसको अवसरमा वृक्षारोपण कार्यक्रम समेत गरिएको थियो।

नेपाल निजामति कर्मचारी युनियनको स्थानीय कार्य समिति अध्यक्ष ओम नारायण यादवको अध्यक्षता तथा नगर प्रमुख विशेश्वर यादवको प्रमुख आतिथ्यमा कार्यक्रम सम्पन्न भएको हो ।

प्रमुख अतिथि मेयर यादवले निजामति कर्मचारी युनियनको भूमिका राज्य सञ्चालन र सेवा प्रवाहमा महत्वपूर्ण रहेको भन्दै युनियनले सदैव कर्मचारीको हकहित र स्थानीय विकासमा अग्रसर भई काम गर्नुपर्ने बताए। उनले वृक्षारोपण जस्ता सामाजिक उत्तरदायित्वसहितका गतिविधिले संगठनलाई अझ बढी जनमुखी बनाउने विश्वास व्यक्त गरे ।

नेपाली काँग्रेसको भातृ संगठनको रुपमा रहेको नेपाल निजामति कर्मचारी युनियनमा आवद्ध कर्मचारीहरुको हकहितको लागि आफू सदैत तत्पर रहेको बताउँदै अन्य सबै कर्मचारीप्रति समान दृष्टिकोणको भावनाले काम गरिरहेको बताए । उनले युनियनले कर्मचारीहरुको हकहितमा सदैव खडा रहने शुभकामना दिए ।

त्यसैगरी अध्यक्ष ओम नारायण यादवले युनियनको स्थापना दिवसले कर्मचारीलाई एकताको भावना जगाइ कार्यप्रति अझ समर्पित बनाउन प्रेरणा दिने बताए। उनले कर्मचारीको व्यावसायिक क्षमता विकास, हकअधिकारको संरक्षण र समाजमा सकारात्मक योगदान गर्ने अभियानलाई निरन्तरता दिनुपर्नेमा जोड दिए।

स्थापना दिवसकै अवसरमा आयोजित वृक्षारोपण कार्यक्रममा सहभागीले वातावरण संरक्षण र हरियाली अभियानलाई निरन्तर अघि बढाउने प्रतिवद्धता जनाएका थिए।

कार्यक्रममा युनियनमा आवद्ध कर्मचारीहरु, नगरपालिकाका कर्मचारीहरु, वडा नं. २ का वडाध्यक्ष ठकु यादव, सशस्त्र बेस क्याम्प दुबरकोटका प्रहरी नीरिक्षक, प्रहरी चौकी माचिका प्रतिनीधिहरुको सहभागीतामा वृक्षारोपण गरिएको थियो ।