जनकपुर राराब कलेज प्रमुखविरुद्ध जातीय छुवाछुतको उजुरी

न्यूज ब्यूरो, जनकपुरधाम । जनकपुरधामस्थित रहेको राराब कलेजका क्याम्पस चिफ बसन्त कुमार कर्णविरुद्ध जिल्ला प्रहरी कार्यालय धनुषामा उजुरी परेको छ ।

क्याम्पस चिफ कर्णले राराब कलेजमै कार्यरत एक कार्यालय सहयोगीसँग जातीय छुवाछुत गरेको आरोपमा उजुरी परेको हो । कलेजमा विगत २४ बर्षदेखि कार्यरत कार्यालय सहयोगी स्थानीय राम बिहारी खत्वेले उजुरी गरेको बताईएको छ ।

खत्वेले आफूलाई दलित भनेर अपमान गरिएको आरोप लगाइएको छ । कार्यालय सहयोगी खत्वेले दिएको उजुरीमा आफूलाई जातीय छुवाछुत गरेको उल्लेख गरेका छन् । उजुरी परेको बारे जिल्ला प्रहरी कार्यालय धनुषाले समेत पुष्टि गरेको छ ।

“क्याम्पस चिफ कर्ण आएदेखि नै आफूलाई दलित भनी भेदभाव पूर्ण व्यवहार गरी मलाई क्याम्पस प्रमुखको कोठा लगायत अन्य कोठाहरूमा समेत प्रवेश गर्न रोक लगाई क्याम्पसका कर्मचारीहरू भेला भएको स्थानमा मलाई बस्न नदिने तिमी छुट्टै बस तिमी हामी बस्ने ठाउँमा नबस दलित तथा सानो जातको मानिसलाई सँगै बस्न दिन्न भने कर्मचारीहरूको समूहमा बस्न नदिई भेदभाव पूर्ण तथा अपमानजनक व्यवहार गर्दा मैले आरोपितलाई भन्ने तपाईँ पनि नेपाल सरकारको कर्मचारी हुनुहुन्छ। म पनि नेपाल सरकारको कर्मचारी हुँ। मैले कुनै कानुन उल्लङ्घन गरेको छैन मैले कुनै गल्ती गरेको छैन भनी आरोपितलाई मौखिक प्रतिवाद गर्दा झन्न उग्र भई मलाई अपशब्द शब्द प्रयोग गरी गाली बेजती गरी अबदेखि तिमीलाई हाम्रो कार्यालय लगायत क्याम्पसको कुनै कोठामा बस्न दिन्न तिमीलाई बाहिर बस्नुपर्छ, क्याम्पसभित्र रहेको कलमा पानी खान दिन खानेपानी घरबाट लिएर आउनुपर्छ भन्दा उहाँको कुरा सुनी छुट्टी भइसकेपछि आफ्नो घरतर्फ लागे।”– उनले उल्लेख गरेका छन् ।

गत भदौ ५ गते दैनिक काममा क्याम्पसमा आउँदा क्याम्पस प्रमुखको कोठा अगाडि बसेको देख्दा आफूलाई दलित भनी कोठा छुइने भनेर अपमान गरेको उल्लेख गरेका छन् । तिम्रो पानी चल्दैन। तिमी पानी नचल्ने व्यक्ति किन मेरो कोठातिर आएको भनी अपमानजनक व्यवहार गर्दा म चुप लागि मलाई तिर्खा लागि क्याम्पसमा रहेको कलमा पानी पिउन जाँदा दलित भएको कारणले मलाई पानी पिउन समेत नदेई कार्यालय समयसम्म पानी पिउन पाएको थिएन।– उनले भनेका छन् ।

यता, खत्वेको उजुरीको सन्दर्भमा क्याम्पस चिफ कर्णसँग सम्पर्क गर्दा उनले फोन उठाएनन् ।