मन्त्रालयमा कर्मचारीको सुदृढिकरण हुँदैछ, योग्य यथावत रहने, अयोग्य हटाइनेछः मन्त्री कुशवाहा

न्यूज ब्यूरो, जनकपुरधाम । मधेश प्रदेशका उद्योग, वाणिज्य तथा पर्यटनमन्त्री ई. बसन्त कुशवाहाले मन्त्रालयमा विगतदेखि नै कार्यरत रहेका कर्मचारीहरुलाई सुदृढिकरण गर्न लागिएको बताएका छन् ।

उनले करार सेवामा कार्यरत कर्मचारीहरुको योग्यता चेकजाँच गरी योग्य ठहरिनेलाई यथावत राखिने जनाएका छन् । मन्त्री कुशवाहाले करार सेवामा कार्यरत कर्मचारीहरुको योग्यता चेकजाँचपछि अयोग्य ठहरिने त्यस्ता कर्मचारीलाई हटाउने निर्णय गरिएको जानकारी दिए ।

प्रदेश लोक सेवा आयोगबाट सिफारिस भएका कर्मचारीहरुलाई सो ठाउँमा पदस्थापना गरिने मन्त्री कुशवाहाले बताए । उनले भने,–“विगतदेखि नै करार सेवामा यहाँ कर्मचारीहरु कार्यरत छन्, तर उहाँहरुको योग्यता कहिले चेकजाँच भएको छैन, मन्त्रालयको काम कारवाही सुदृढ बनाउनको लागि यो निर्णय गरिएको छ । करारमध्येमै योग्य ठहरिनेलाई काममा यथावत राखिनेछ ।”

प्रदेश लोकसेवा आयोगबाट सिफारिस भएर पनि पदस्थापन हुन नपाएका कर्मचारीहरुलाई करार कर्मचारीको ठाउँमा पदस्थापन गरिने योजना रहेको मन्त्री कुशवाहाको भनाई छ । उनले सुदृढिकरणको क्रममा करारमा भर्ना भएका कर्मचारीहरुलाई मूल्याँकन फाराम मार्फत कार्य मूल्याँकन गरिने बताए ।

मन्त्री कुशवाहाका अनुसार, करार सेवामा भर्ना भई नियमित नआउने, मन्त्रालयलाई अटेरी गर्ने, मूल्याँकनमा पास नहुने कर्मचारीलाई मन्त्रालयबाट हटाएर अन्य ठाउँमा पदस्थापन गर्ने कार्य गरिने छ ।

उनले भने, –“प्रदेश लोकसेवाबाट आएका नायब सुब्बा, शाखा अधिकृत, प्रशासन तर्फका कर्मचारीहरु धेरै आउनुभएको छ । यहाँ करार सेवामा आवश्यकता नै नभएको ठाउँमा उहाँहरुलाई पदस्थापन गरिनेछ । कर्मचारी आवश्कता नभएको रिक्त ठाउँबाट लोकसेवाका कर्मचारीलाई राखिने मन्त्रालयको योजना छ ।”

करार सेवामा कार्यरत कर्मचारीहरुलाई मूल्याँकनको हिसाबले कार्य दक्षता हेरी विभिन्न स्थानमा कामकाजमा खटाइने समेत उनले थपे । “मन्त्रालय अन्तर्गत रहेका विभिन्न उद्योगहरुमा करार कर्मचारीहरुको कार्य दक्षताको आधारमा पोष्टिँग गरिनेछ । सबैलाई हटाउनै लागेको भन्ने कुरा भ्रामक मात्र रहेको छ । करारका कर्मचारीहरुलाई पनि दक्षताको आधारमा व्यवस्थापन गर्नेछौँ, मन्त्रालयमा नरहेपनि मातहतका कार्यालयहरुमा उहाँहरुलाई स्थान दिइनेछ ।”

तर, मूल्याँकनमा अयोग्य नै ठहरिने त्यस्ता कर्मचारीलाई राख्नैपर्ने बाध्यता भने नराख्ने मन्त्री कुशवाहाले जानकारी दिए ।