सामुहिक बलात्कार काण्डका  मुख्य योजनाकार -'दरबार होटलका सँचालक'

न्यूज ब्यूरो | सिरहा, २ साउन । गत ३१ गते असार राती एक महिलासँग गाडीमै भएको सामुहिक बलात्कार काण्डमा फोरमका नेता एव्म लहान स्थित रहेको दरबार होटलका सँचालक नै मुख्य योजनाकार रहेको रहस्य खुलेको छ ।

संघीय समाजवादी फोरमका केन्द्रिय सदस्य विरेन्द्र साहका छोरा २६ वर्षीय नितेश कुमार साह सामुहिक बलात्कार घटनाका नाइके भएको रहस्य खुलेको हो ।

गत असार ३१ राती करिब ११ बजे सिरहाको लहानबाट महिलालाई अपहरण गरी गाडीमै बलात्कार गर्ने चार युवकलाई प्रहरीले त्रियुगा नगरपालिकाको लालपताबाट रंगेहात पक्राउ गरेपछि यो रहस्य खुलेको हो ।

लहान बजारबाट अपरहण गरी स्कार्पियो गाडीबाट राति ११ बजे समातिएका उनीहरुलाई प्रहरीले सोमवार सार्वजनिक गर्दै थप अनुसन्धानबाट साह यस बलात्कार काण्डका मुख्य नाईके रहेको तथ्य खुलेको छ ।

लहानबाट अपहरण गरी गाडीमै बलात्कार गर्दैगर्दा चार बलात्कारी उदयपुरमा रंगेहात समातिए

ति चार युवामध्ये नेता साहका छोरा घटनाका योजनाकार भएको प्रहरी स्रोतले जनाएको छ । नेता साहका छोरासँगै लहान नगरपालिका–७ का २४ वर्षीय अमित गुप्ता, सोही स्थानका २५ वर्षीय सन्देश गुप्ता, २५ वर्षीय विवेक साह पनि पक्राउ परेका छन ।

भुमाफिया भनेर चिनिने विरेन्द्र साहका छोरा बलात्कार घटनामा पक्राउ परेपछि उनी तनावमा परेका छन । विभिन्न नेतासँग छोरा छुटाउन प्रहरीलाई दबाब समेत दिन थालेको स्रोतको दावी छ ।

लहान बजारमा आँप बेच्ने ३५ वर्षीया एक महिलालाई नेता साहको छोराको योजनातहत अपहरण गरेर गाडीमै बलात्कार गर्दै उदयपुरको त्रियुगा नगरपालिका लग्दै थिए ।

बा १४ च ६८१७ नम्बरको स्कार्पियो गाडीमा ती महिलालाई निःवस्त्र अवस्थामा ल्याउँदै गरेका बेला प्रहरी चौकी लालपता उदयपुरका प्रहरीले उनीहरुलाई रंगेहात पक्राउ गरेको थियो ।

पक्राउ परेका नेता साहका छोरा लहानस्थित होटल दरबारका संचालक समेत हुन । उनकै नाममा होटल दर्ता रहेको छ ।

बलात्कारका आरोपीहरुलाई जिल्ला अदालत उदयपुरबाट म्याद थप गरी जबरदस्ती करणीको मुद्दा चलाइएको उदयपुरका एसपी नवराज भट्टले न्यूज ब्यूरोसँग भने ।