धनुषामा दुई दिवसीय आँप मेला सम्पन्न, दर्जन प्रकारको आँप प्रदर्शन, १० लाख बढीको कारोबार

न्यूज ब्यूरो, जनकपुरधाम । धनुषाको बटेश्वर गाउँपालिका १ चित्रपुरमा शनिबारदेखि जारी दुई दिवसीय आँप मेला सम्पन्न भएको छ । उत्पादित आँपलाई प्रवद्र्धन, बाजारिकरण तथा पर्यटन क्षेत्रको रुपमा विकास गर्ने उद्देश्यले आयोजना गरिएको “चित्रपुर आँप मेला महोत्सव – २०८२” मा करिब २० हजारभन्दा बढी मानिसले अव्लोकन गरेको आयोजकले जनाएको छ ।

चित्रपुर म्याङ्गो एग्रो टुरिज्म बोर्डको आयोजनामा भएको मेलाको उदघान शनिबार मधेश प्रदेशका सभामुख रामचन्द्र मण्डलले गरेका थिए । मेलामा विभिन्न थरिका आँप अचार, अमोट, आमिल, जुस प्रदर्शनसँगै विक्रीवितरण समेत गरिएको बोर्डका अध्यक्ष प्रदीप महतोले बताए । मेलामा १० लाख भन्दा बढीको कारोबार भएको महतोको भनाइ छ ।

उनका अनुसार मेलमा आगन्तुकलाई निःशुल्क रुपमा खुवाइएको छ । आँपकै रुखमा पिंग (झुल्ला) बनाएर न्यून शुल्कमा अतिथिलाई रमाइलो गराएको उनको भनाइ छ ।

तीन सयविघा भन्दा बढी क्षेत्रफलमा रहेको आँप खेती रहेको चित्रपुरको बगैंचमा गत वर्षदेखि किसानहरु मिलेर आँपको प्रवद्र्धनसँगै बाजारीकरणको लागि आँप मेला आयोजन गर्न थालेका हुन् ।

आगामी वर्षदेखि अझ् राम्रो ढंगबाट मेला आयोजन गर्ने आयोजकले जनाएको छ ।